مادەنيەت جانە سپورت ءمينيسترى اقتوتى رايىمقۇلوۆا سەربيا استاناسى بەلگرادتا وتكەن بوكستان ەرلەر اراسىنداعى XXI الەم چەمپيوناتىنىڭ جەڭىمپازدارىن، جۇلدەگەرلەرىن جانە قازاقستان قۇراماسىنىڭ باپكەرلەرىن قابىلدادى دەپ حابارلايدى almaty-akshamy.kz سپورت جانە دەنە شىنىقتىرۋ ىستەرى كوميتەتىنىڭ باسپا ءسوز قىزمەتىنە سىلتەمە جاساپ.
مينيستر ءوز سوزىندە سەربياداعى چەمپيوناتتا قازاقستان قۇراماسى قول جەتكىزگەن بىرنەشە ەلەۋلى وقيعانى اتاپ ءوتتى.
قازاقستان ەگەمەن ەل رەتىندە 1993 جىلدان بەرى بوكستان الەم چەمپيوناتتارىنا ۇزدىكسىز قاتىسىپ كەلەدى. وسى ارالىقتاعى 15 الەم چەمپيوناتىندا ءبىزدىڭ بىلعارى قولعاپ شەبەرلەرى 51 مەدالدى قورجىنعا سالدى. ونىڭ 14ء-ى التىن، 15ء-ى كۇمىس، 22ء-سى قولا. وسى باسەكەدە ءبىز بارلىق جۇلدە سانى بويىنشا اقش-تان وزىپ، جالپى ەسەپتە كۋبا مەن رەسەيدەن كەيىن ءۇشىنشى ورىنعا كوتەرىلىپ وتىرمىز. بۇل ءبىزدىڭ بوكستان الەمدەگى جەتەكشى مەملەكەتتىڭ ءبىرى ەكەنىمىزدى كورسەتەدى. الداعى ۋاقىتتا دا تىنىمسىز ەڭبەكتىڭ ارقاسىندا سپورتشىلارىمىز وسى قارقىنىمەن جۇلدە قورىن مولايتا بەرەدى دەپ سەنەمىن. سىزدەر ءۇشىن كەلەسى مەجەنىڭ ءبىرى – تاشكەنتتە وتەتىن الەم چەمپيوناتى بولماق، – دەدى مينيستر.
سونىمەن قاتار اقتوتى رايىمقۇلوۆا بارلىق بوكسشىمىز شارشى الاڭدا بارىن سالىپ جۇدىرىقتاسقانىن، جارقىن جەكپە-جەكتەرىمەن قالىڭ جانكۇيەردىڭ جوعارى باعاسىن العانىن جەتكىزدى.
سىزدەر وسى ءدۇبىرلى دودادا جوعارى شەبەرلىكتەرىڭىزدى پاش ەتتىڭىزدەر. ءار جەكپە-جەكتە جەڭىسكە دەگەن زور قۇشتارلىق تانىتتىڭىزدار. مۇنى سىزدەرگە قىزۋ قولداۋ كورسەتكەن جانكۇيەرلەر سەزەدى. ءاربىر ۇلكەن جەڭىستىڭ ارتىندا سپورتشىنىڭ تاباندىلىعىمەن قاتار باپكەردىڭ قاجىرلى ەڭبەگى تۇرادى. وسى تۇستا ءبىزدىڭ باپكەرلەر قوسىنىنا ەرەكشە العىس ايتقىم كەلەدى. لايىم شاكىرتتەرىڭىز سەنىم ۇدەسىنەن شىعىپ، ۇمىتتەرىڭىزدى اقتاسىن، – دەپ ايتتى مينيستر.
كەزدەسۋ بارىسىندا ۇلتتىق قۇرامانىڭ كاپيتانى ابىلايحان ءجۇسىپوۆ ءسوز الىپ، چەمپيوناتقا تىڭعىلىقتى دايىندالۋ ءۇشىن جاعداي جاساعانى ءۇشىن مينيسترلىككە، فەدەراسياعا قۇراما اتىنان راقمەت ايتتى.
وسىدان كەيىن مادەنيەت جانە سپورت ءمينيسترى الەم چەمپيوناتىنىڭ جەڭىمپازدارى مەن جۇلدەگەرلەرىنە سپورتتىق اتاقتاردى، رازريادتاردى جانە بىلىكتىلىك ساناتتارىن بەرۋ نورمالارى مەن تالاپتارىنا سايكەس، قازاقستاننىڭ ەڭبەك سىڭىرگەن جاتتىقتىرۋشىسى جانە ەڭبەك سىڭىرگەن سپورتشىسى اتاعىن ورىنداعان باپكەرلەر مەن بوكسشىلاردى ماراپاتتادى.
ەكى جىلدا ءبىر وتەتىن بوكستان الەم چەمپيوناتى 26 قازان مەن 6 قاراشا ارالىعىندا بەلگراد قالاسىندا وتكەن بولاتىن. بۇل چەمپيوناتقا الەمنىڭ 105 مەملەكەتىنەن 650 سپورتشى قاتىستى. قازاقستان قۇراماسى ساپىنان 13 سپورتشى اتتانىپ، قۇراما 2 التىن، 2 كۇمىس، 1 قولا مەدال جەڭىپ الدى. وسىلايشا، جالپى كوماندالىق ەسەپتە ەكىنشى ورىنعا تۇراقتادى.