بجزق پورتفەلىن ءارتاراپتاندىرۋ ناتيجەسىندە زەينەتاقى اكتيۆتەرى مەن ينۆەستيسيالىق كىرىس كولەمى وسكەن
مەملەكەت باسشىسى ۇلتتىق بانك ءتوراعاسىنىڭ بيىلعى 10 ايداعى اقشا-كرەديت ساياساتىن ىسكە اسىرۋدىڭ الدىن الا قورىتىندىسى جانە الەمدەگى ينفلياسيالىق قىسىمنىڭ كۇشەيىپ، ازىق-تۇلىك باعاسىنىڭ قىمباتتاي تۇسكەنى تۋرالى ەسەبىن تىڭدادى. سونىمەن قاتار قاسىم-جومارت توقايەۆقا حالىقارالىق ۆاليۋتا قورىنىڭ ينفلياسيانى تۇراقتاندىرۋ جونىندەگى بولجامدارى، سونداي-اق دامىعان ەلدەردىڭ ىنتالاندىرۋ ساياساتىنان بەيتاراپ ساياساتقا كوشۋىنە بايلانىستى دامۋشى نارىقتاردان كاپيتالدىڭ جىلىستاۋ ءقاۋپى بار ەكەنى ايتىلدى، Almaty-akshamy.kz اقوردانىڭ رەسمي سايتىنا سىلتەمە جاساپ.
كەزدەسۋ بارىسىندا ۇكىمەتپەن بىرلەسىپ، ينفلياسياعا توتەپ بەرۋ جونىندەگى شارالار كەشەنىن جۇزەگە اسىرۋعا قاتىستى پرەزيدەنت تاپسىرمالارىنىڭ ورىندالۋ بارىسى، سونداي-اق ازىق-تۇلىك باعاسىنىڭ ءوسۋى بولار-بولماس باياۋلاعانىنا بايلانىستى قازان ايىنداعى جىلدىق ينفلياسيانىڭ دەڭگەيى 8،9 پايىز بولعانى تۋرالى اقپارات بەرىلدى.
ەربولات دوسايەۆ قاسىم-جومارت توقايەۆقا بيىلعى 9 ايدا قالىپتاسقان تولەم بالانسىنىڭ الدىن الا باعالاۋ كورسەتكىشى تۋرالى مالىمەت ۇسىندى. باعالاۋعا سايكەس ساۋدا بالانسىنىڭ جاقسارۋىنا بايلانىستى تولەم بالانسىنىڭ تاپشىلىعى 3 ميلليارد اقش دوللارىنا دەيىن تومەندەگەن. تۇتىنۋشىلىق يمپورتتىڭ ءوسۋى تولەم بالانسىنىڭ ودان ءارى جاقسارۋىن تەجەيدى.
پرەزيدەنتكە التىن باعاسىنىڭ قىمباتتاۋى ەسەبىنەن التىنۆاليۋتا قورى اكتيۆتەرىنىڭ ءوسۋى جونىندە جانە جىل باسىنان بەرى ۇلتتىق قورداعى ينۆەستيسيالىق كىرىستىڭ 2 ميلليارد اقش دوللارىنا (3،44%) دەيىن قايتا قالپىنا كەلگەنى تۋرالى اقپارات بەرىلدى.
ۇلتتىق بانكتىڭ دەرەكتەرىنە سايكەس بجزق پورتفەلىن ءارتاراپتاندىرۋ ناتيجەسىندە زەينەتاقى اكتيۆتەرى مەن ينۆەستيسيالىق كىرىس كولەمى وسكەن.
سونىمەن قاتار ەربولات دوسايەۆ مەملەكەت باسشىسىنىڭ تاپسىرماسىن ورىنداۋ ماقساتىندا ۇلتتىق تولەم جۇيەسىن پيلوتتىق رەجيمدە ىسكە قوسۋعا دايىن ەكەنىن جەتكىزدى.
كەزدەسۋ سوڭىندا قاسىم-جومارت توقايەۆ ۇلتتىق بانك ءتوراعاسىنا ءبىرقاتار ناقتى تاپسىرما بەردى.