راحىمجان وتاربايەۆتىڭ ءومىرى مەن شىعارماشىلىعىنا ارنالعان بيبليوگرافيالىق ەڭبەك جارىق كوردى

ۇلتتىق كىتاپحانادا كورنەكتى قازاق جازۋشىسى، قازاق ينتەللەكتۋالدى پروزاسىنىڭ ءىرى وكىلى، دراماتۋرگ، مەملەكەت جانە قوعام قايراتكەرى راحىمجان وتاربايەۆتىڭ ءومىرى مەن شىعارماشىلىعىنا ارنالعان بيبليوگرافيالىق كورسەتكىشتىڭ تۇساۋكەسەرى ءوتتى، دەپ حابارلايدى Almaty-akshamy.kz.
⠀
بيبليوگرافيالىق كورسەتكىش ق ر ۇلتتىق كىتاپحاناسى مەن «راحىمجان وتاربايەۆ رۋحانيات قورى» جەكە قورىمەن بىرلەسىپ شىعارىلدى.
⠀
ءىس-شارانى قازاقستاننىڭ ەڭبەك سىڭىرگەن قايراتكەرى، اتىراۋ وبلىسى يندەر اۋدانىنىڭ قۇرمەتتى ازاماتى، الماتى قالاسى «ەڭبەگى ءۇشىن» مەدالىنىڭ يەگەرى بەرعالييەۆ امانتاي جۇرگىزدى.
⠀
شارانى ق ر ۇلتتىق كىتاپحاناسى ديرەكتورىنىڭ اقپاراتتىق تەحنولوگيالار جانە يننوۆاسيالار جونىندەگى ورىنباسارى يسكالييەۆا نۋريا امانعالي قىزى قۇتتىقتاۋ سوزبەن اشتى.
⠀
ۇلتتىق بيبليوگرافيا قىزمەتىنىڭ بيبليوگرافى نۇرىمبايەۆا جادىرا سلايد ارقىلى بيبليوگرافيالىق كورسەتكىشپەن تانىستىردى. كورسەتكىشتەگى ماتەريالدار 1977 جىلدان 2022 جىلدىڭ قاراشا ايىنا دەيىنگى كەزەڭدەگى جازۋشىنىڭ كىتاپتارى، اڭگىمەلەرى، پوۆەستەرى، ولەڭدەرى، پەسالارى، اۋدارمالارى، ادەبي سىن-زەرتتەۋلەرى، ماقالالارى، باياندامالارى، سۇحباتتارى، قاتىسۋىمەن شىققان باسىلىمدارى جانە ءومىرى مەن شىعارماشىلىعى تۋرالى جازىلعان ەڭبەكتەردى قامتيدى.
⠀
راقىمجان وتاربايەۆتىڭ ۇلى ەرمەرەي راقىمجان ۇلى ۇلتتىق كىتاپحانا قورىنا جازۋشىنىڭ «باس» رومانىن سىيعا تارتىپ، ۇجىمعا جانە كەلگەن قوناقتارعا العىسىن ءبىلدىردى.
⠀
شارا اياسىندا ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ ستۋدەنتى حاميدۋللا شەرحان ءسادىقوجا ماشان ۇلىنىڭ «ساعىنساڭ، قالقام، ءوزىڭ كەل» اتتى ءانىن ورىندادى.
⠀
سونداي-اق، ق ر ۇلتتىق كىتاپحاناسىنىڭ قورىنان راقىمجان وتاربايەۆتىڭ ءومىرى مەن شىعارماشىلىعىنا ارنالعان «جالعىز اتتى جولاۋشىمىن» اتتى كىتاپ كورمەسى ۇيىمداستىرىلدى جانە جازۋشىنىڭ وتباسى ۇسىنعان قىسقاشا دەرەكتى بەينەجازبا كورسەتىلدى.