قىزىلشا – اۋرۋ ادامنان ساۋ ادامعا اۋا تامشىلارى ارقىلى بەرىلەتىن وتە جۇقپالى ءجىتى ۆيرۋستىق اۋرۋ.
12-15 ايلىق جانە 6 جاس ارالىعىنداعى بالالارعا پروفيلاكتيكالىق ەگۋلەردىڭ ۇلتتىق كۇنتىزبەسىنە سايكەس قىزىلشاعا قارسى جوسپارلى ەگۋلەر جۇرگىزىلەدى، دەپ حابارلايدى Almaty-akshamy.kz
قازاقستان رەسپۋبليكاسى پرەزيدەنتى ءىس باسقارماسىنىڭ مەديسينالىق ورتالىعى (بۇدان ءارى – مەديسينالىق ورتالىق) قازاقستان رەسپۋبليكاسىندا قىزىلشامەن سىرقاتتانۋشىلىقتىڭ وسۋىنە بايلانىستى كەلەسىنى حابارلايدى.
يممۋنيتەتى جوق ادامداردىڭ قىزىلشامەن سىرقاتتانعان اداممەن بايلانىستا بولعاننان كەيىن اۋرۋعا شالدىعۋ مۇمكىندىگى 100%-عا جۋىق.
اۋرۋ باستاپقىدا كادىمگى جەدەل رەسپيراتورلىق ۆيرۋستىق ينفەكسياعا نەمەسە تۇماۋعا ۇقسايدى. ادەتتە، دەنە قىزۋىنىڭ كوتەرىلۋى، باس اۋرۋى، بۇلشىقەت سىرقىراپ اۋىرۋى، تاماق اۋرۋى، مۇرىننىڭ بىتەلۋىنەن باستالىپ، جوتەل جانە كونيۋنكتيۆيت تەز ءورشيدى. قىزىلشانىڭ باسقا ينفەكسيالاردان ايىرماشىلىعى، ادەتتە اۋرۋدىڭ باستالۋىنان ءۇشىنشى كۇنى ناۋقاستاردا داقتى-پاپۋليارلىق ەلەمەنتتەر دەپ اتالاتىن ديامەترى بىرنەشە ميلليمەترلىك ايقىن قىزىل ءتۇستى داقتار مەن بورتپەلەردىڭ پايدا بولۋى ءتان. باستاپقىدا بورتپە ادامنىڭ بەتىندە پايدا بولادى، سودان كەيىن دەنەنىڭ بارلىق بولىكتەرىنە جايىلىپ تومەن تۇسەدى. قىزىلشانىڭ اسقىنۋلارىنا: سوقىرلىق، ەنسەفاليت، مەنينگيت، مەنينگوەنسەفاليت، پولينيەۆريت، پنيەۆمونيا، وتيت جانە باسقا اۋرۋلار جاتادى.
حالىقتى قىزىلشادان قورعاۋدىڭ بىردەن-بىر ءادىسى – جوسپارلى جانە شۇعىل ۆاكسينالاۋ. ۆاكسينالانعان ادامدار ءىس جۇزىندە قىزىلشامەن اۋىرمايدى. 12-15 ايلىق جانە 6 جاس ارالىعىنداعى بالالارعا پروفيلاكتيكالىق ەگۋلەردىڭ ۇلتتىق كۇنتىزبەسىنە سايكەس قىزىلشاعا قارسى جوسپارلى ەگۋلەر جۇرگىزىلەدى. شۇعىل پروفيلاكتيكا قىزىلشامەن سىرقاتتانعان ناۋقاسپەن بايلانىستا بولعاننان كەيىن 72 ساعاتتان كەشىكتىرمەي جۇرگىزىلەدى.
مەديسينالىق ورتالىق ينفەكسيانىڭ تارالۋىن بولدىرماۋ ماقساتىندا كەلەسىنى ۇسىنادى:
- ادام كوپ جينالاتىن ورىندارعا بارۋدى شەكتەۋ؛
- ءۇي-جايلاردى ءجيى جەلدەتۋ؛
- ءجىتى رەسپيراتورلىق ۆيرۋستىق ينفەكسيالار جانە بورتپەلەردىڭ بەلگىلەرى بار قىزمەتكەرلەردى جۇمىستان شەكتەتۋ؛
- قىزمەتكەرلەردىڭ دەنساۋلىعى ناشارلاعان جاعدايدا جۇمىسقا بارۋدان باس تارتىپ، دياگنوز قويۋ ءۇشىن دارىگەرگە قارالۋ.
ەگەر دارىگەر قىزىلشاعا كۇدىكتەنسە، دەرەۋ شارا قولدانۋ ءۇشىن باسشىلىققا حابارلاۋ قاجەت.
قىزمەتكەر قىزىلشامەن اۋىرعان اداممەن بايلانىستا بولعان جاعدايدا، ناۋقاس وقشاۋلانعان كەزدەن باستاپ 21 كۇن ىشىندە اۋرۋ بەلگىلەرى بار ادامداردى بەلسەندى تۇردە انىقتاۋ جانە وقشاۋلاۋ ماقساتىندا مەديسينالىق قىزمەتكەرلەردىڭ كۇندەلىكتى تەكسەرىپ-قاراۋ ارقىلى مەديسينالىق قاداعالاۋى بەلگىلەنەدى.