ساراپشىلاردىڭ ايتۋىنشا، ناۋقاستاردىڭ ۇشتەن ەكىسى ەكپە الماعان بالالار.
ناۋقاستاردىڭ باسىم بولىگى الماتى مەن جامبىل وبلىستارىندا، سونداي-اق الماتى مەن شىمكەنتتە تىركەلگەن، دەپ حابارلايدى Almaty-akshamy.kz
قازاقستاندا 10 مىڭ قىزىلشا اۋرۋىن جۇقتىرعان ادام تىركەلسە، ونىڭ 80%-دان استامى 14 جاسقا دەيىنگى بالالار.
وتكەن اپتادا ءوسىم شامامەن 30%-دى قۇرادى.
"اۋرۋدىڭ كوبەيۋىن ءبىز بالالاردىڭ جوسپارلى ەكپەدەن قالىپ قويۋىمەن، سونىمەن قاتار وقۋ جىلىنىڭ باستالىپ، ادامداردىڭ شوعىرلانۋ ورىندارى قالىپتاسۋىمەن بايلانىستىرامىز"، - دەيدى قوعامدىق دەنساۋلىق ساقتاۋ ۇلتتىق ورتالىعى توتەنشە جاعدايلار بويىنشا جەدەل ورتالىعىنىڭ ديرەكتورى جانىبەك ەربايەۆ.
قىزىلشا وتە جۇقپالى اۋرۋ بولعاندىقتان، اۋرۋ جۇقتىرۋ كورسەتكىشى ارتىپ جاتىر.
دارىگەرلەر اسقىنۋلارعا سوقىرلىق، ەنسەفاليت، اۋىر ديارەيا، سوعان بايلانىستى اعزانىڭ سۋسىزدانۋى، قۇلاق ينفەكسيالارى جانە تىنىس الۋدىڭ اۋىر پروبلەمالارى، سونىڭ ىشىندە پنيەۆمونيا بولۋى مۇمكىن دەپ ەسكەرتەدى.