قازاقتىڭ قاھارمان قىزى
كوكتەمنىڭ العاشقى كۇنى ەلوردادان باستاۋ العان روزا باعلانوۆانىڭ 100 جىلدىق مەرەيتويى بۇگىن سىر وڭىرىندە جالعاسىن تاپتى، دەپ حابارلايدى Almaty-akshamy.kz.
قىزىلوردا قالاسىندا نارتاي بەكەجانوۆ اتىنداعى قىزىلوردا وبلىستىق قازاق اكادەميالىق مۋزىكالىق دراما تەاترىندا قازاقستاننىڭ حالىق ءارتىسى، حالىق قاھارمانى روزا باعلانوۆانىڭ 100 جىلدىق مەرەيتويىنا ارنالعان «قازاقتىڭ قاھارمان قىزى» اتتى مەرەكەلىك كونسەرت ءوتتى.
بۇل مەرەكەلىك كونسەرت وبلىس اكىمى نۇرلىبەك نالىبايەۆتىڭ كونسەرتتى وتكىزۋگە كەلگەن ەلىمىزدىڭ تانىمال ونەر جۇلدىزدارىمەن كەزدەسۋىمەن باستالدى.
ايماق باسشىسى حالىق قاھارمانى، قازاقتىڭ بۇلب ۇلى اتانعان روزا باعلانوۆانىڭ ءىزىن جالعاپ، اندەرىن ناسيحاتتاۋدا ونەر يەلەرىنىڭ ايرىقشا ورنى بار ەكەنىن جەتكىزىپ، ءىلتيپاتىن كورسەتتى.
«ايتۋلى كونسەرتكە قازاقتىڭ ءان ونەرىن اسقاقتاتىپ، ۇلت مادەنيەتىن كوتەرۋگە ەڭبەك ءسىڭىرىپ جۇرگەن وزدەرىڭىزدىڭ قاتىسىپ، ونەر كورسەتۋلەرىڭىز سىر جۇرتشىلىعى ءۇشىن ۇلكەن ماقتانىش دەپ بىلەمىن. بۇگىن سىر ەلىندە ءان مەن ونەر مەرەكەسى عانا ەمەس، ۇلت رۋحانياتىنىڭ جاڭعىرعان كۇنى دەسە بولادى. ونەر كوشىندەگى سىزدەر تۇرعاندا ءان پاديشاسى، قازاقتىڭ قاھارمان قىزى روزا باعلانوۆانىڭ ەسىمى ۇرپاقتان-ۇرپاققا جالعاسا بەرەتىنى ءسوزسىز»، - دەدى نۇرلىبەك نالىبايەۆ.
كونسەرتتە قازاقستاننىڭ حالىق ءارتىسى نۇرعالي ءنۇسىپجانوۆ، سۇلۋشاش نۇرماعانبەتوۆا، التىنبەك قورازبايەۆ، گۇلنار سيقىمبايەۆا، جەڭىس سەيدۋللا ۇلى، جەڭىس ىسقاقوۆا، يگور بلاگودارنىي، ايگۋل يمانبايەۆا، اسحات ۇرپەكوۆ، شابا، نۇرلان البان، باۋىرجان يسايەۆ، زارينا جاكەنوۆا سىندى ارتىستەر مەن قۇرمانعازى اتىنداعى قازاق ۇلتتىق وركەسترى ونەر كورسەتتى.
ونەر مايتالماندارى نۇرعالي ءنۇسىپجانوۆ، التىنبەك قورازبايەۆ پەن سۇلۋشاش نۇرماعانبەتوۆا روزا باعلانوۆانىڭ ونەر الەمىندەگى قولتاڭباسىن ءسوز ەتىپ، سىر جۇرتىنىڭ ونەر يەلەرىنە دەگەن قۇرمەتى ءۇشىن العىسىن جەتكىزدى.
مۇنان سوڭ، ءوڭىر باسشىسى ۇلت ونەرىنىڭ مايتالماندارىنا سىر حالقى اتىنان سىي-سياپات جاساپ، قۇرمەتىن كورسەتتى.
ايتا كەتەيىك، قازاق ونەرىنىڭ ءبىرتۋار انشىسىنە ارنالعان بۇل كەرەمەت ءان كەشى مادەنيەت جانە سپورت مينيسترلىگىنىڭ ۇيىمداستىرۋىمەن ءوتتى.
سىر ءوڭىرى – حالىق دەگەن ءار تالانتىن توبەسىنە كوتەرە الاتىن، ۇلتىم دەگەن ۇل-قىزدارىن ۇلىقتاي الاتىن ءورىستى ءوڭىر. وعان وسى مەرەيتويدا كۋا بولدىق. سىر توپىراعىنان تۇلەپ ۇشقان ونەر يەسى، ءان پاديشاسى روزا ءتاجىباي قىزىنىڭ اندەرىن ساعىنعان كورەرمەندەر ونەر جۇلدىزدارى مەن كونسەرتتى ۇيىمداستىرۋشىلارعا دەگەن قۇرمەت قوشەمەتىن ايامادى. ءان كەشى وتە جوعارى دەڭگەيدە ءوتتى.