Threads الەۋمەتتىك جەلىسىندە استاناداعى دونەر ساتاتىن ورىنداردىڭ بىرىندە قىزمەتكەر ارىپتەسىنىڭ ۇستىنە ىستىق مايدى توگىپ جىبەرگەن ءسات تۇسىرىلگەن ۆيدەو تارادى. بۇل وقيعا جەلىدە قىزۋ تالقىلانىپ جاتىر، - دەپ جازادى Aqshamnews.kz.
نە بولدى؟
ۆيدەودان قىزمەتكەر ىستىق ماي قۇيىلعان ىدىستى الىپ شىققانى كورىنەدى. ءبىر ساتتە ول تەپە-تەڭدىگىن جوعالتىپ، ىدىس توڭكەرىلىپ، ماي ەكىنشى قىزمەتكەردىڭ ۇستىنە قۇيىلادى.
پوست اۆتورى وقيعا سالدارى وتە اۋىر بولعانىن جازادى. ونىڭ ايتۋىنشا، كومپانيا زارداپ شەككەن قىزمەتكەردىڭ جاراقاتى ءۇشىن جاۋاپكەرشىلىك الماعان.
"ونىڭ بۇكىل ارقاسى ىرىڭدەپ جاتىر. كومپانيا جاۋاپكەرشىلىكتى موينىنا العىسى كەلمەيدى. بۇل - سۇمدىق. مۇمكىن، تەرى اۋىستىرۋ وپەراسياسى قاجەت بولاتىن شىعار"، – دەلىنگەن جازبادا.
كومپانيا نە دەيدى؟
جەلىدە ۆيدەو كەڭ تاراپ كەتكەن سوڭ، وقيعاعا قاتىستى كومپانيا رەسمي پىكىر ءبىلدىردى.
مەكەمە مالىمدەمەسىندە زارداپ شەككەن قىزدىڭ ەمىنە اقى تولەنبەدى دەگەن اقپارات شىندىققا سايكەس كەلمەيدى دەپ كورسەتىلگەن.
"وقيعا راسىمەن دە شامامەن ءبىر اي بۇرىن ءبىزدىڭ ءدامحانالاردىڭ بىرىندە بولعان. بۇل وتە جاعىمسىز جاعداي – قىزمەتكەردىڭ ۇستىنە ابايسىزدا ىستىق ماي توگىلگەن. ءبىز بىردەن بارلىق قاجەتتى كومەكتى كورسەتتىك، زارداپ شەككەن قىزدىڭ اتا-اناسىمەن كەزدەستىك، ەم-دومىنا اقى تولەدىك جانە وتەماقى بەردىك"، – دەلىنگەن Instagram پاراقشاسىنداعى مالىمدەمەدە.
ەڭبەك مينيسترلىگى مەن پوليسيا نە دەيدى؟
Tengri Life تىلشىلەرى بۇل جاعدايعا بايلانىستى ەڭبەك مينيسترلىگىنە جانە استانا قالالىق پوليسيا دەپارتامەنتىنە سۇراۋ سالعان.
"ەگەر جۇمىستاعى جازاتايىم وقيعادان كەيىن زارداپ شەككەن ادام وزىنە ەم-دوم شىعىندارى نەمەسە وتەماقى تولەنۋى كەرەك دەپ ساناسا، ءبىراق جۇمىس بەرۋشىمەن كەلىسىمگە كەلە الماعان جاعدايدا، تۇرعىلىقتى مەكەنجايى بويىنشا ەڭبەك ينسپەكسياسىنا جۇگىنۋى قاجەت. ءاربىر جاعداي جەكە قارالادى"، – دەدى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتى.