قىز − ءومىردىڭ گ ۇلى، بارلىق ادامزاتتىڭ قادىرلەپ، ايالايتىن اسىل ارۋى دەسەك تە ارتىق ەمەس. وتباسىندا ءبىر ەمەس، جەتى قىزدى تاربيەلەپ وتىرعان نۇرداۋلەت پەن ايگەرىم قاراۋىلبايەۆتاردىڭ جانۇيالىق ءومىرى - كوپكە ۇلگى. ولار الەۋمەتتىك جەلىدە بەلسەندى بلوگ جۇرگىزىپ، وتباسىلىق ترەندتەردەن قالىس قالعان ەمەس. 15 مامىر - وتباسى كۇنىنە وراي Aqshamnews.kz ءتىلشىسى ەرەكشە وتباسىنىڭ اڭگىمەسىن تىڭدادى.
نۇرداۋلەت قالىمبەت ۇلى پەن ايگەرىم قاليجان قىزىنىڭ تانىسۋى دا، وتباسىن قۇرۋى دا ەرەكشە. ولار 2010 جىلى الەۋمەتتىك جەلى ارقىلى سويلەسىپ جۇرگەن. بىرنەشە ايلىق دوستىقتان كەيىن اراداعى سەزىم ماحابباتقا ۇلاسىپ، 2011 جىلى ناۋرىز ايىندا وتباسىن قۇرادى. بۇگىندە ولار شىمكەنت قالاسىندا تۇرادى. ايگەرىم – دەكرەتتەگى انا، ال جۇبايى بەدەلدى كومپانيادا جۇمىس ىستەيدى.
«قىز بالا دەپ رەنجىگەن ەمەسپىز»
نۇرداۋلەت پەن ايگەرىم قاراۋىلبايەۆتار وتباسىندا جەتى قىز ءوسىپ كەلەدى: كاۋسار، جانەركە، جاسمين، گاۋھار، بالاۋسا، ارۋنا جانە ادەمى ەسىمدى “جەتى جۇلدىز” بار. تۇڭعىشى دۇنيەگە كەلگەندە ايگەرىم ءوزى دە جاس انا بولعاندىقتان، ونىمەن بىرگە ەسەيىپ، انا بولۋدى ۇيرەنگەنىن اڭگىمەلەپ بەردى.
«ءبىز ەشقاشان قىز بالا دەپ رەنجىگەن ەمەسپىز. جولداسىم دا ۇل بولمادى دەپ كوڭىل تۇسىرگەن ەمەس. قايتا قىزدارىن وتە جاقسى كورەدى. ءيا، “مۇمكىن ۇل شىعار؟” دەگەن ويلار بولعان، ءبىراق اللانىڭ بەرگەنىنە شۇكىر دەدىك»، – دەيدى ايگەرىم قاليجان قىزى.
قىزدارىنىڭ ەسىمدەرىن كوبىنە جولداسىنىڭ اتا-اناسى مەن اپكەلەرى قويعان. تەك ەڭ كىشكەنتايلارى – ارۋنا مەن ادەمىگە ەسىمدەردى اتا-اناسى وزدەرى تاڭداعان.
«جەتى جۇلدىز» بلوگى قالاي باستالدى؟
وتباسىمەن بىرگە تابيعات اياسىنا سەرۋەندەۋدى، باسقا قالالارعا ساياحات جاساۋدى جاقسى كورەتىن جانۇيا 2024 جىلى تۇركىستانعا ساپار شەگىپ بارا جاتىپ، وتباسىلىق ۆيدەولارىن YouTube جەلىسىنە جاريالاۋعا بەل بۋعان. وسىلايشا «جەتى جۇلدىز» اتتى بلوگ جۇرگىزەتىن ارنا جارىق كورەدى.
«بۇگىندە YouTube-تا 54 مىڭ، TikTok-تا 92 مىڭ، Instagram-دا 27 مىڭ كورەرمەنىمىز بار. العاشىندا تەك چەللەندج تۇسىرسەك، كەيىن وتباسىلىق قۇندىلىقتاردى ناسيحاتتايتىن، تاربيەلىك ءمانى بار ۆيدەولار تۇسىرۋگە كوشتىك»، – دەيدى اناسى.
ولاردىڭ ۆيدەولارىندا، اسىرەسە، اكەنىڭ قىزدارىنا دەگەن ەرەكشە ماحابباتى كورىنىس تابادى. «قىز بالا راسىمەن اكەسىنە ەرەكشە جاقىن بولادى ەكەن»، – دەيدى ول.
“قىز تاربيەسى – ۇلتتىڭ تاربيەسى”
ايگەرىم قاليجان قىزى ءۇشىن قىز تاربيەسى – ۇلكەن جاۋاپكەرشىلىك پەن مەيىرىمنىڭ ۇيلەسىمى. ول قىزدارىن ەركەلەتىپ ءوسىرىپ، بالا كەزىندەگى بالالىق شاقتارىن تولىق سەزىنۋگە مۇمكىندىك بەرۋگە تىرىسادى.
«باستىسى – جاقسى ادام بولىڭدار، ءبىلىمدى بولىڭدار، العىس الىڭدار دەپ تاربيەلەپ وتىرامىز. ونەردەن دە قۇر قالماسىن دەپ، دومبىرا ۇيىرمەسىنە دە قاتىسۋلارىنا مۇمكىندىك بەرەمىز»، – دەيدى ول.
قىزدار ءۇي شارۋاسىنا دا قولعابىس ەتەدى. دەسە دە، اناسى قىزدارىمەن قۇربىسىنداي ارالاساتىنىن ايتتى.
قىز – بولاشاقتىڭ ىرگەسى
ايگەرىم حانىم ءوز سوزىندە قازاق حالقىنىڭ قىز بالاعا دەگەن قۇرمەتى ەرەكشە ەكەنىن ايتتى.
«قازاق ءاردايىم قىزدى جوعارى ورىنعا قويدى. قىزعا توردەن ورىن بەرىپ، ۇنەمى سىي-قۇرمەتكە بولەيتىن. باۋىرجان مومىش ۇلى اتامىز ايتپاقشى: "جەر بەتىندەگى ەڭ باتىر ادام ول - قىز. مەن قانشا باتىر بولسام دا، بوتەن، تانىمايتىن ەلگە ءبىر ساعات تا تۇرعىم كەلمەي قاشامىن. ال، قىز بولسا، بارعان جەرىندە جالعىز ءوزى ومىرىندە كورمەگەن، تانىمايتىن ادامدارمەن ءتىل تابىسىپ، سول ەلدى بىرىكتىرىپ ەل دە قىلا الادى، سىيلاتا دا الادى، الىسا دا الادى، قايمىقپاستان ۇرپاعىن دا كوبەيتىپ، سول ەلدى جەڭىپ، ماڭگى بيلەيدى”، - دەگەن ەكەن. سول سياقتى قىز بالانىڭ تاربيەسىنە كەز كەلگەن وتباسى ۇلكەن جاۋاپكەرشىلىكپەن قاراۋ كەرەك»، – دەيدى ايگەرىم.