الماتىدا اكىمنىڭ تاپسىرماسىمەن «حالىق قاتىساتىن بيۋدجەت» باعدارلاماسى اياسىندا اۋلالار جوندەلىپ جاتىر
الماتىنىڭ المالى اۋدانىندا اكىم ەربولات دوسايەۆتىڭ تاپسىرماسىمەن «حالىق قاتىساتىن بيۋدجەت» باعدارلاماسى اياسىندا بيىل 56 اۋلا كورىكتەندىرىلدى، دەپ حابارلايدى aqshamnews.kz
قازىرگى تاڭدا پانفيلوۆ كوشەسى، 30؛ شاگابۋتدينوۆ كوشەسى، 30؛ تولە بي كوشەسى، 160؛ قابانباي باتىر كوشەسى، 91 جانە ءشارىپوۆ كوشەسى، 68 مەكەنجايلارىنداعى بەس اۋلانىڭ جۇمىسى اياقتالدى. مۇندا ويىن جانە سپورت الاڭدارى جاڭارتىلىپ، رەزەڭكە جابىن توسەلدى، ورىندىقتار مەن قوقىس جاشىكتەرى ورناتىلدى. ءشارىپوۆ كوشەسى، 68 مەكەنجايىندا تۇرعىنداردىڭ ءوتىنىشى بويىنشا سپورت الاڭىنا ۇلكەن قالقا ورناتىلدى.
«سپورت الاڭىنىڭ كوركەيتىلگەنىنە قۋانىشتىمىن، ۇلكەن قالقا ورناتىلدى، بۇل اشىق اۋادا سپورتپەن اينالىساتىندارعا ىڭعايلى. كۇن ساۋلەسى مەن جاڭبىردان جاقسى قورعانىس. مەن ۇستەل تەننيسىن ءجيى وينايمىن نەمەسە كوشەدەگى جاتتىعۋ قۇرىلعىلارىندا جاتتىعامىن. ەندى ءبارى جاقىن، جاتتىعۋ جاساعاندا ىڭعايلى، جاقسى بولدى. ءبىزدىڭ اۋلالار بەلسەندى دەمالىس پەن ارالاسۋعا ارنالعان ورىنعا اينالىپ جاتقانىنا قۋانىشتىمىز»، – دەدى اۋدان تۇرعىنى مەدەت احمەتوۆ.
2025 جىلى «حقب» باعدارلاماسى اياسىندا اۋدان بويىنشا بارلىعى 45 جوبا جۇزەگە اسىرىلادى. كوركەيتۋ جۇمىستارى بيىل ءساۋىر مەن قازان ايلارى ارالىعىندا جۇرگىزىلەدى.
ءقاۋىپسىز ءارى ءتيىمدى تۇرعىن ۇي-كوممۋنالدىق ينفراقۇرىلىمدى قالىپتاستىرۋ ماقساتىندا 7 كوپقاباتتى تۇرعىن ۇيگە جوندەۋ جۇرگىزۋ جوسپارلانعان. بۇل ۇيلەردىڭ شاتىرى، قاسبەتى جانە ينجەنەرلىك جەلىلەرى جاڭارتىلادى. سونىمەن قاتار، 5 كوپقاباتتى ۇيدە جەدەلساتى جابدىقتارى اۋىستىرىلادى.
ەستەرىڭىزگە سالا كەتەيىك، 2024 جىلى 11 كوپقاباتتى تۇرعىن ۇيدە 18 جەدەلساتى جابدىعى جاڭارتىلىپ، 7 تۇرعىن ۇيگە جوندەۋ جۇمىستارى جۇرگىزىلگەن بولاتىن. سونداي-اق، 2024 جىلى اۋدان بويىنشا «حقب» اياسىندا 52 جوبا ىسكە اسىرىلىپ، قوسىمشا 23 اۋلا اۋماعىندا اعىمداعى جوندەۋ جۇمىستارى اتقارىلدى.
جالپى، سوڭعى ءۇش جىلدا الماتىدا 938 جوبا جۇزەگە اسىرىلعان.