قىتايمەن شەكاراداعى بۇرىنعى اۋدانداردى قايتا قۇرۋ ماسەلەسى قارالىپ جاتىر. بۇل تۋرالى ۇلتتىق ەكونوميكا ءمينيسترى الىبەك قۋانتىروۆ بۇگىن ۇكىمەت وتىرىسىندا ءمالىم ەتتى، دەپ حابارلايدى Almaty-akshamy.kz.
«شەكارا ماڭىنداعى ايماقتاردى دامىتۋ ءۇشىن قانداي شارالار قابىلدانۋدا؟»، - دەپ سۇرادى ءاليحان سمايىلوۆ ۇلتتىق ەكونوميكا مينيسترىنەن.
الىبەك قۋانتىروۆتىڭ ايتۋىنشا، شەكارا ماڭىنداعى اۋدانداردىڭ ينفراقۇرىلىمىن دامىتۋ قولدانىستاعى مەملەكەتتىك باعدارلامالار اياسىندا ىسكە اسىپ جاتىر.
«2019-2022 جىلدارى «اۋىل – ەل بەسىگى» باعدارلاماسى بويىنشا شەكارالىق اۋىلدا 1،5 مىڭ جوبا ىسكە اسىرىلعان. بيىل 134 اۋىلدا 300-گە جۋىق جوبا جۇزەگە اسىرىلىپ جاتىر»، - دەدى ول.
سونداي-اق ۆەدومستۆو باسشىسى شەكارالىق اۋىلداردى ساپالى ينتەرنەتپەن جانە بايلانىسپەن قامتاماسىز ەتۋ ماسەلەسى كۇن تارتىبىندە تۇرعانىن اتاپ ءوتتى.
«ءتۋريزمدى، ترانسشەكارالىق ءتۋريزمدى دامىتۋ ءۇشىن قازىرگى تاڭدا ءتيىستى جول كارتاسى ازىرلەنۋدە. شەكارالىق اۋداندار دەگەندە، اسىرەسە، قىتايمەن شەكتەسىپ جاتقان كەيبىر اۋماقتارداعى بۇرىنعى اۋدانداردىڭ مارتەبەسىن قالپىنا كەلتىرۋ ماسەلەسى قاراستىرىلىپ جاتىر»، - دەدى مينيستر.