ىستامبۇلدان - بىشكەككە باعىت العان ۇشاقتا جۇڭگو ازاماتى رەسەيلىك جولاۋشىنىڭ ارقا قورجىنىنان 6700 دوللاردى ۇرلاعان، دەپ حابارلايدى Almaty-akshamy.kz. "سۆودكا اكيpress".
رەسەيلىك ازامات قۇقىق قورعاۋ ورگاندارىنىڭ قىزمەتكەرلەرىنە وتە بەرىستەگى كرەسلوعا جايعاسىپ، سومكەسىن ورىندىق ارقاسىندا ءىلىپ قويعانىن ايتىپتى. ۇشاق اۋەگە كوتەرىلىسىمەن ول ۇيىقتاپ قالعان، ال ويانعان سوڭ سۋى بار شولمەكتى العىسى كەلگەن. وسى كەزدە ول ارقا قورجىنى باسقاشا جابىلعانىن بايقايدى. ەر ادام بىردەن قورجىنعا سالعان ون مىڭ دوللارداي اقشاسى ورنىندا ما دەپ تەكسەرە باستاپتى. ال اقشا بۋماسىن الىپ شىققاندا، ونىڭ ايتارلىقتاي ازايىپ قالعانىن بايقاعان.
ول بىردەن ارتىندا وتىرعان ادامنان كومەك سۇراپتى، وسى كەزدە ارتىنداعى ادام وزگە جولاۋشىنى نۇسقاپ، جۇڭگو ازاماتى ونىڭ قورجىنىنا قول سالعانىن ايتقان. مۇنى بايقاي سالا، قىتايلىق اسىعا-ۇسىگە دارەتحاناعا بەت الىپتى، الايدا قايتىپ كەلىسىمەن ۇستالىپ قالدى. ولار كۇدىكتىنى بورتسەرىككە اپارىپ، جاعدايدىڭ انىق-قانىعىنا كوز جەتكىزبەك بولعان. ەكيپاج قىزمەتكەرلەرى دارەتحانانى اقتارىپ، قاعاز تۇراتىن ورىننان جاسىرۋلى تۇرعان 6700 دوللاردى تاۋىپ الىپتى.
اۋە كەمەسى بىشكەككە قونا سالىسىمەن، ۇرىنى زاڭ قىزمەتكەرلەرى ۇستادى. سوت ونى 100 مىڭ سوم (526 مىڭ تەڭگە شاماسىندا) ايىپپۇل تولەۋگە مىندەتتەدى. سونىمەن قوسا، ونى قىرعىزستاننان دەپورتاسيالاۋ تۋرالى شەشىم قابىلدانعان.