قىتايعا جويقىن تايفۋن جاقىنداپ كەلەدى

شىعىس جانە وڭتۇستىك قىتايدىڭ جاعالاۋ ايماقتارىندا داۋىلدىڭ ماكسيمالدى «قىزىل دەڭگەيى» جاريالاندى.

سەبەبى جۇما كۇنى «دوكسۋري» قۋاتتى تايفۋنى تونەدى دەپ كۇتىلەدى. بۇل تۋرالى قىتايدىڭ ورتالىق مەتەورولوگيا قىزمەتى ءمالىم ەتتى، دەپ حابارلايدى Almaty-akshamy.kz.

مەتەورولوگيالىق بولجامدارعا سايكەس، «دوكسۋري» تايفۋنى ماتەريكتىك قىتايعا بەت بۇرىپ، سولتۇستىك-باتىس باعىتتا جىلجىپ، فۋسزيان، گۋاندۋن، چجەسزيان، انحوي، سزيانسي جانە باسقا دا پروۆينسيالارعا اسەر ەتەدى.

27 شىلدە تاڭعى ساعات 06:00-دەگى جاعداي بويىنشا، تايفۋن تايۆان ارالىنىڭ وڭتۇستىك شەتىنەن 220 شاقىرىمداي جەردە بولىپ، سولتۇستىك-باتىسقا قاراي 10-15 كم/ساع جىلدامدىقپەن جىلجىپ كەلەدى.

تايفۋن جۇما كۇنى تاڭەرتەڭ فۋسزيان جانە گۋاندۋن پروۆينسيالارىنىڭ جاعالاۋ ايماقتارىنا جەتەدى دەپ كۇتىلۋدە.

مەتەورولوگتاردىڭ بولجامىنشا، تايفۋننىڭ قارقىندىلىعى ماتەريكتىك قىتايعا جاقىنداعان سايىن ارتا تۇسەدى، وسى ۋاقىتقا دەيىن ونىڭ ورتالىق بولىگىندەگى جەلدىڭ جىلدامدىعى 52 م/س جەتكەن.

قحر توتەنشە جاعدايلاردى باسقارۋ مينيسترلىگى قازىرگى ۋاقىتتا جوعارى دايىندىق جاعدايىندا تۇرعان 4 مىڭنان استام ادام مەن تەحنيكانى جۇمىلدىردى. بيلىك تۇرعىندارعا سۋ تاسقىنى مەن كوشكىن ءقاۋپى تۋرالى ەسكەرتتى.