قىتايدىڭ شىڭجاڭ-ۇيعىر اۆتونوميالىق ولكەسىندە (ءشۇاو) كوروناۆيرۋس وشاعى انىقتالدى. سوڭعى 24 ساعاتتا بۇل ايماقتا COVID-19 ينفەكسياسىنىڭ بەلگىلەرى بولماعان توعىز ناۋقاس تىركەلگەن، دەپ حابارلايدى Almaty-akshamy.kz Inform.kz-كە سىلتەمە جاساپ.
جۇڭگو حالىق رەسپۋبليكاسىنىڭ دەنساۋلىق ساقتاۋ ىستەرى جونىندەگى مەملەكەتتىك كوميتەتىنىڭ مالىمەتىنشە، سوڭعى تاۋلىكتە شۇاو-دە كوروناۆيرۋستىڭ بەلگىلەرى بولماعان توعىز ناۋقاس انىقتالدى.
جەرگىلىكتى باق-تىڭ حابارلاۋىنشا، COVID-19 ۆيرۋسىن تاسىمالداۋشى توعىز ادامنىڭ جەتەۋى ينين قالاسىندا تىركەلگەن. ىندەتتىڭ الدىن الۋ جانە باقىلاۋ جونىندەگى جەرگىلىكتى شتابتىڭ مالىمەتى بويىنشا، ينين قالاسىنان كەتەتىن جولاۋشىلار ۇشۋعا دەيىن 24 ساعات ىشىندە كوروناۆيرۋسقا پتر سىناماسىنان ءوتۋى ءتيىس. بۇعان دەيىن ءۇرىمجى قالاسىندا ۆيرۋس جۇقتىرۋ بەلگىلەرى بولماعان ءبىر تاسىمالداۋشى انىقتالعان.
جالپى، قحر دەنساۋلىق ساقتاۋ ىستەرى جونىندەگى مەملەكەتتىك كوميتەت مالىمەتىنشە، سوڭعى تاۋلىكتە ماتەريكتىك قىتايدا كوروناۆيرۋس ينفەكسياسىن جۇقتىرۋدىڭ 400-گە جۋىق جاعدايى انىقتالدى.