جۇڭگو حالىق رەسپۋبليكاسىندا قورعانىس ءمينيسترى دۋن سزيۋنگە قاتىستى سىبايلاس جەمقورلىق بويىنشا تەرگەۋ باستالعانى تۋرالى The Financial Times مالىمەت تاراتتى. بۇل تەرگەۋ قىتايدىڭ حالىق ازاتتىق ارمياسىنداعى جەمقورلىق سحەمالارىن اشۋعا باعىتتالعان كەڭ اۋقىمدى تەرگەۋدىڭ ءبىرى بولىپ تابىلادى، دەپ حابارلايدى aqshamnews.kz
دۋن سزيۋن وسى قىزمەتكە 2023 جىلدىڭ جەلتوقسان ايىندا تاعايىندالعان بولاتىن، ال ونىڭ الدىنداعى ەكى قورعانىس ءمينيسترى — لي شانفۋ مەن ۆەي فەنحە سىبايلاس جەمقورلىققا قاتىسى بار دەگەن ايىپتارمەن قىزمەتىنەن بوساتىلعان ەدى. وسىلايشا، دۋن سزيۋن قىتايداعى ءۇشىنشى قاتارداعى قورعانىس ءمينيسترى، جەمقورلىقپەن بايلانىستى تەرگەۋگە الىنعان تۇلعا بولىپ وتىر.
جاڭا ايىپتار مەن تەرگەۋ قىتايدا سوڭعى جىلدارى جەمقورلىققا قارسى كۇرەستىڭ تيىمدىلىگىنە قاتىستى سۇراقتار تۋعىزۋدا. جۇڭگو ۇكىمەتى جەمقورلىقپەن كۇرەستى جالعاستىرىپ، ارميا مەن ونىڭ باسشىلىعىنىڭ ءيميدجىن جاقسارتۋدى ماقسات ەتىپ وتىرعانىن مالىمدەدى.
اقپاراتقا سايكەس، 2012 جىلى سي سزينپين جۇڭگو حالىق رەسپۋبليكاسىنىڭ باسشىسى بولىپ سايلانعاننان بەرى ەلدە سىبايلاس جەمقورلىققا قارسى كۇرەس ايتارلىقتاي كۇشەيگەن. سوڭعى جىلدارى جۇزەگە اسىرىلعان كەڭ اۋقىمدى ناۋقاننىڭ ناتيجەسىندە تەك مەملەكەتتىك قىزمەتكەرلەر عانا ەمەس، جوعارى لاۋازىمدى تۇلعالار دا قىزمەتىنەن، ءتىپتى ءومىر بويىنا باس بوستاندىعىنان ايىرىلدى.