سوڭعى كۇندەرى بۇكىل جۇڭگو جانە الەمدىك ءباسپاسوزدىڭ نازارىن اۋدارعان ساياحاتتاۋشى پىلدەر قازىرگى تاڭدا ورماندا ۇيىقتاپ جاتىر. ونى باقىلاۋ دروندار ارقىلى جۇرگىزىلۋدە.
15 جابايى ءپىل جانە ءۇش ءپىلدىڭ ءتولى 15 اي بۇرىن قىتايدىڭ وڭتۇستىك-باتىسىنداعى تۋعان جەرلەرىنەن بەلگىسىز باعىتقا جولعا شىققان بولاتىن. سودان بەرى شاعىن ەلدى مەكەندەر، ءتىپتى ۇلكەن قالالار ارقىلى 500 شاقىرىمعا جۋىق جولدى ءجۇرىپ ءوتتى، دەپ حابارلادى Almaty-akshamy.kz Bbc.com cايتىنا سىلتەمەلەپ.
سەيسەنبىدە قاتتى جاڭبىر جاۋىپ، پىلدەر ورماندا ۇيقىعا جاتتى.
قىتايلىق CGTN تەلەارناسىنىڭ حابارلاۋىنشا، پىلدەر ساياحاتتاپ جۇرگەن يۋننان پروۆينسياسىنىڭ بيلىگى ارنايى بولگەن 14 درون مەن تابىندى باقىلايتىن 500-گە جۋىق ادام ەلدى مەكەندەردەگى جولداردى جاۋىپ، جانۋارلاردى وڭتۇستىك-باتىسقا، ۇيگە قاراي باعىتتاۋعا تىرىسۋدا.
سوڭعى ۋاقىتقا دەيىن بۇل ارەكەتتەر ءساتسىز اياقتالدى. ءبىراق ءقازىر تابىن ۇيگە قاراي بۇرىلعان سياقتى، بۇگىندە ولار لاوس پەن ميانما شەكاراسىنداعى سيشۋانباننا ايماعىنداعى مەنيانسزى قورىعىندا ءجۇر.
يۋننان ورمان ءورت ءسوندىرۋ بريگاداسىنىڭ باقىلاۋلارىنا سايكەس، پىلدەردىڭ ءبىرى تابىننان ءبولىنىپ، ءقازىر ودان ءتورت شاقىرىم قاشىقتىقتا ءجۇر.
ءوزىنىڭ رەكوردتىق جورىعى كەزىندە تابىن ميلليونداعان يۋانعا ەگىن جەپ، تاپتاپ، بىرنەشە عيماراتتارعا زاقىم كەلتىرىپ، كوپتەگەن جەرگىلىكتى تۇرعىنداردى ۇرەيلەندىرىپ، ەسىكتەر مەن تەرەزەلەرگە مۇرىندارىن سۇعىپ، ەلدى شوشىتتى.
پىلدەر ءتىپتى التى ميلليون حالقى بار كۋنمين قالاسىنا جول تارتتى.
ىشان ەلدى مەكەنىنەن پىلدەر التى ميلليونىنشى كۋنمينگە اپاراتىن نەگىزگى تاس جولمەن ءوتتى.
ازيالىق (ءۇندى) پىلدەر تابىنىنىڭ ادەتتەگى تىرشىلىك ەتۋ ورتاسىنان الىس قاشىقتىققا كەتۋ سەبەبى تۇسىنىكسىز بولىپ قالادى.
جابايى ازيالىق (ءۇندى) پىلدەر قىزىل كىتاپقا ەنگىزىلگەن. قىتايدا ولاردىڭ سانى ءۇش جۇزگە جۋىق، ولاردىڭ كوپشىلىگى يۋننان پروۆينسياسىندا.
عالىمداردىڭ ايتۋىنشا، يۋننان پىلدەرى مەكەندەيتىن جەرلەرىنەن مۇنشالىقتى الىس كەتپەگەن.