قىتايداعى سۋ تاسقىنى سالدارىنان كوپتەگەن ادام ەۆاكۋاسيالاندى

بيلىك 60 مىڭعا جۋىق ادامدى ۇيلەرىنەن كوشىردى. 11 ادام ءىز-تۇزسىز جوعالعان.

قىتايدا بىرنەشە كۇننەن بەرى تولاسسىز جاۋعان نوسەر جاۋىن سالدارىنان حالقى ەڭ كوپ گۋاندۋن پروۆينسياسىندا قاتتى سۋ تاسقىنى بولدى، دەپ حابارلايدى ۆۆس.

بيلىك 60 مىڭعا جۋىق ادامدى ۇيلەرىنەن كوشىردى. 11 ادام ءىز-تۇسسىز جوعالىپ كەتتى، ازىرگە زارداپ شەككەندەر تۋرالى مالىمەت جوق.
شەنەۋنىكتەردىڭ ايتۋىنشا، بىرنەشە ءىرى وزەن ارناسىنان اسىپ كەتكەن. ۇكىمەت سۋدىڭ «ءقاۋىپتى دەڭگەيدە كوتەرىلۋىن» مۇقيات قاداعالاپ وتىر. گۋاندۋننىڭ سولتۇستىگىندەگى ءبىر وزەندەگى سۋ دەڭگەيى 22 ساۋىردە تاڭەرتەڭ 100 جىلدا ءبىر رەت بولاتىن ەڭ جوعارى دەڭگەيگە جەتۋى مۇمكىن، ءبىراق تۇسكە دەيىن شارىقتاۋ شەگىنە جەتكەن جوق.

پروۆينسيانىڭ استاناسى گۋانچجوۋ، سونداي-اق شاعىن شاوگۋان جانە حەيۋان قالالارى قاتتى زارداپ شەككەندەردىڭ ءبىرى بولدى. پروۆينسيا بويىنشا دەمالىس كۇندەرى شامامەن 1،16 ميلليون ءۇي ەلەكتر قۋاتىن جوعالتتى، ءبىراق 21 ءساۋىر كۇنى كەشكە ولاردىڭ 80% ەلەكتر قۋاتى قالپىنا كەلتىرىلدى.

بۇعان قوسا، تولاسسىز جاۋعان جاڭبىر گۋانچجوۋداعى بايۋن حالىقارالىق اۋەجايىندا رەيستەردىڭ توقتاتىلۋىنا جانە كەشىگۋىنە، سونداي-اق بىرنەشە قالادا مەكتەپتەردىڭ جابىلۋىنا اكەلدى. پروۆينسيادا ونداعان ءۇي قيرادى نەمەسە قاتتى زاقىمداندى. بيلىكتىڭ مالىمەتىنشە، تىكەلەي ەكونوميكالىق شىعىن شامامەن 140،6 ميلليون يۋان (شامامەن 8،8 ميلليارد تەڭگە) بولدى.

وقي وتىرىڭىز: ازيانى كليمات وزگەرۋى قاۋپىنەن قالاي قۇتقارۋعا بولادى؟

قىتايدىڭ مەتەورولوگيالىق قىزمەتى گۋاندۋن مەن كورشىلەس فۋسزيان پروۆينسياسىنىڭ جاعالاۋ ايماقتارىندا نوسەر جاڭبىر كەم دەگەندە 23 ساۋىرگە دەيىن جالعاسادى دەپ ەسكەرتتى.