«اتامەكەن» ۇكپ الاڭىندا پالاتا ءتورالقاسىنىڭ ءتوراعاسى رايىمبەك باتالوۆ پەن تۋريزم جانە سپورت ءمينيسترىنىڭ ورىنباسارى ەرجان ەركىنبايەۆتىڭ قاتىسۋىمەن قىتايداعى قازاقستان ءتۋريزمى جىلىنا دايىندىق بارىسىنا ارنالعان كەڭەس ءوتتى.
رايىمبەك باتالوۆ مۇنداي ءىس-شارالار ەكى ەل اراسىنداعى ەكونوميكالىق جانە مادەني بايلانىستاردى نىعايتاتىنىن، قىتايلىق ارىپتەستەرىمەن تىكەلەي B2B بايلانىس ورناتۋدىڭ ماڭىزدى ەكەنىن اتاپ ءوتتى، دەپ حابارلايدى Almaty-akshamy.kz.
تۋريزم جانە سپورت ءمينيسترىنىڭ ورىنباسارى ەرجان ەركىنبايەۆ قىتايداعى قازاقستان ءتۋريزمى جىلىنىڭ تۇجىرىمداماسىن تانىستىرىپ، ەكى ەلدىڭ تۋريزم سالاسىنداعى ىنتىماقتاستىعىن كەڭەيتۋگە باعىتتالعان ءىس-شارالار جوسپارىن ايتتى.
تۋربيزنەس وكىلدەرىمەن وتكەن كەزدەسۋدە قىتايلىق تۋريستەردى قابىلداۋعا دايىندىق، بىلىكتى گيدتەردى وقىتۋ، حالىقپەن جۇمىس ىستەۋ، سونداي-اق قىتايدان كەلگەن قوناقتار ءۇشىن ارنايى تۋرلار مەن ءىس-شارالاردى ۇيىمداستىرۋ ماسەلەلەرى تالقىلاندى.
ايتا كەتەيىك، وسى اپتانىڭ باسىندا تۋريزم جانە سپورت ءمينيسترى ەرمەك مارجىقپايەۆ قىتايدا قحر مادەنيەت جانە تۋريزم ءمينيسترى سۋن ەليمەن كەزدەسىپ، قىتايداعى قازاقستان ءتۋريزمى جىلىن وتكىزۋدىڭ نەگىزگى اسپەكتىلەرىن كەلىسكەن بولاتىن.
قىتايداعى قازاقستان ءتۋريزمى جىلى Kazakhstan Belt & Road Destination ۇرانىمەن وتەدى. اشىلۋ سالتاناتى 2024 جىلدىڭ ناۋرىز ايىنىڭ سوڭىندا بەيجىڭدە وتەدى دەپ جوسپارلانعان. سونداي-اق تۋريزم جىلى اياسىندا 35-تەن استام ءىس-شارا، سونىڭ ىشىندە b2b ءىس-شارالار، تاقىرىپتىق اپتالار، شىعارماشىلىق ۇجىمداردىڭ گاسترولدەرى جانە ت.ب. وتكىزۋ جوسپارلانعان.
تۋريزم جىلى قىتايداعى ەڭ ءىرى تۋريستىك كورمەلەرگە، تانىستىرۋ تۋرلارىنا، جارنامالىق اكسيالارعا جانە الەۋمەتتىك جەلىلەرگە قاتىسۋ ارقىلى بەلسەندى تۇردە ىلگەرىلەيتىن بولادى.
تۋريزم جىلىنىڭ رەسمي جابىلۋى 2024 جىلدىڭ جەلتوقسان ايىندا الماتىدا وتەدى.