ءانشى ديماش قۇدايبەرگەن قىتايداعى باستى تەلە ارنانىڭ جوباسىنا قاتىستى. بۇل تۋرالى dimashnews.com سايتى جازدى، دەپ حابارلايدى اlmaty-akshamy.kz.
8 ماۋسىمدا CCTV-1 ارناسى قىتايدىڭ ورتالىق راديو جانە تەلەديدارى مادەنيەت جانە تۋريزم مينيسترلىگىمەن بىرلەسە وتىرىپ، جۇڭگو مەن باسقا دا شەتەلدەر اراسىنداعى كەڭ اۋقىمدى حالىقارالىق مادەني الماسۋ ماقساتىندا جۇزەگە اسىرعان «سۇلۋلىق پەن ۇيلەسىمدىلىك» جوباسىنىڭ جاڭا ءبولىمىن كورسەتتى.
مۋزىكا شەكارالاردى، ال مادەنيەت كوپىرلەردى باعىندىردى. اۋەن باستالعاندا، مەنىڭ انىمنەن كۇش پەن قايراتتىڭ لەبى سەزىلىپ تۇرادى دەگەن ۇمىتتەمىن، – دەپ جىلى لەبىزبەن ديماش جانكۇيەرلەرىن باعدارلامانى تاماشالاۋعا شاقىردى.
سول جوبا كەشىندە ديماشتىڭ بىرنەشە جىلدان بەرى جەكە كونسەرتتەرىنىڭ نەگىزى بولعان ەرەكشە كۇش پەن قايراتقا تولى «Golden» ءانى جوبانىڭ ساحناسىندا تاعى دا شىرقالدى.
ال حالىقارالىق ىنتىماقتاستىق رەتىندە قازاقستاندىق ءانشى ديماش قۇدايبەرگەن قىتايدان كەلگەن سۋچجوۋ جاستار سيمفونيالىق وركەسترىنىڭ حورى POLY WeDo سۇيەمەلدەۋىمەن ايگىلى «You Raise Me Up» كومپوزيسياسىن ۇسىندى.
ەسكە سالا كەتەيىك، ديماش وتكەن جىلدىڭ قازان ايىندا وتكەن «سۇلۋلىق پەن ۇيلەسىمدىلىك» جوباسىنىڭ پرەمەرا بولىمىنە قاتىسقان بولاتىن. ودان كەيىن اتاقتى پيانيست لانگ لانگپەن بىرگە كومپوزيتور سين سينحايدىڭ «سارى وزەننىڭ قايىقشىسىنىڭ ءانى» اتتى فورتەپيانولىق كونسەرتىنىڭ ءبىرىنشى ءبولىمىنىڭ فراگمەنتىن ورىنداپ، قازاقتىڭ حالىق ءانى «دۋدارايدى» ءتول ءداستۇرلى ناقىشتا جانە دجاز-فانك ستيلىندە ۇسىندى.