مينيسترلىك مالىمەتىنشە، بۇقارالىق اقپارات قۇرالدارى مەن الەۋمەتتىك جەلىلەردە جاستاردى ەرىكسىز ۇستاپ الىپ، جەرگىلىكتى اسكەري باسقارۋ ورگاندارىنا جەتكىزىپ جاتقان بەينەماتەريالدار تاراتىلىپ جاتىر، دەپ حابارلايدى اlmaty-akshamy.kz.
"وسىعان بايلانىستى قورعانىس مينيسترلىگى جىلىنا ەكى رەت (كوكتەمگى جانە كۇزگى اسكەرگە شاقىرۋ) جۇزەگە اسىرىلاتىن اسكەري قىزمەتكە شاقىرۋدىڭ قولدانىستاعى ءتارتىبىن تۇسىندىرۋگە وكىلەتتى. شاقىرۋ ناۋقاندارى بارىسىندا كەيبىر ازاماتتاردىڭ اسكەري قىزمەتتەن جالتارىپ، جەرگىلىكتى اسكەري باسقارۋ ورگاندارىنا ۋاقتىلى كەلمەۋ فاكتىلەرى بايقالادى.
سونىمەن قاتار، اسكەرگە شاقىرۋ جاسىنداعى ازاماتتاردى ەسەپكە الۋدا دا قيىندىقتار تۋىندايدى. ويتكەنى ولاردىڭ كوپشىلىگى تىركەلگەن جەرىندە تۇرمايدى. ال قونىس اۋدارعان جاعدايدا جاڭا تۇرعىلىقتى مەكەنجايىنا تىركەلمەيدى"، - دەيدى مينيسترلىك وكىلدەرى.
قولدانىستاعى زاڭناماعا سايكەس شاقىرۋ قاعازىن اسكەرگە شاقىرىلۋشىنىڭ جەكە وزىنە تاپسىرۋ مۇمكىن بولماعان كەزدە ونىڭ كەلۋىن قامتاماسىز ەتۋ ىشكى ىستەر ورگاندارىنا جۇكتەلەدى.
"رەيد كەزىندە كەيبىر ازاماتتار ىشكى ىستەر ورگاندارى قىزمەتكەرلەرىنىڭ زاڭدى تالاپتارىنا باعىنباي، قارسىلىق كورسەتىپ جاتادى. مۇنداي جاعدايدا پوليسيا قىزمەتكەرلەرى ولاردى ءماجبۇرلى تۇردە ۇستاپ، شاقىرۋ پۋنكتىنە جەتكىزۋدى جۇزەگە اسىرۋعا قۇقىلى. شاقىرۋ كوميسسياسى جەتكىزىلگەن ادامداردىڭ مارتەبەسىن سول جەردە انىقتايدى. مەرزىمدى اسكەري قىزمەتكە شاقىرۋعا نەگىز بولماعان جاعدايدا ولاردى ۇيىنە جىبەرەدى. ال شاقىرۋعا نەگىز بولسا، مەديسينالىق كوميسسيادان وتۋگە جانە شاقىرۋ شەڭبەرىندەگى باسقا دا ءىس-شارالاردى وتكىزۋگە جىبەرەدى.
ەستەرىڭىزگە سالا كەتەيىك، مەرزىمدى اسكەري قىزمەتكە شاقىرۋدان جالتارعانى ءۇشىن زاڭنامادا اكىمشىلىك جانە قىلمىستىق جاۋاپكەرشىلىك قاراستىرىلعان. وسىنىڭ نەگىزىندە ازاماتتاردان قولدانىستاعى زاڭناما تالاپتارىن ساقتاۋدى جانە جالعان اقپاراتتى تاراتپاۋدى سۇرايمىز"، - دەيدى مينيسترلىكتەگىلەر.