قىتايداعى لوكداۋن مەن سانيتارلىق شەكتەۋلەرگە قاراماستان شانحايدا حالىقارالىق يمپورتتىق كورمە ءوتىپ جاتىر، دەپ حابارلايدى Almayu-akshamy.kz «حابار 24»-كە سىلتەمە جاساپ.
ۇلكەن اۋدانعا جايعاسقان كورمەدە ءبىر مىڭعا جۋىق كومپانيا ءوز بۇيىمدارىن ۇسىنعان. شانحايداعى حالىقارالىق كورمەسىنە قاتىسۋشىلاردىڭ كەيبىرەۋى ىشىنە كىرە العان جوق. اشىلۋىنا ءبىر كۇن قالعاندا ولارعا رۇقساتتاماسىنىڭ كۇشى جويىلعانى تۋرالى حابارلاما كەلدى. بۇعان قىتايدىڭ كەيبىر وڭىرلەرىندە ىندەتتىڭ ءورشۋى سەبەپ بولدى. ال قالعاندارى ءار كىرگەن سايىن پتر-تەستتىڭ جاڭا ناتيجەسىن، ۆاكسينالاۋ سەرتيفيكاتىن جانە ءبىزدىڭ «اشىققا» ۇقساس جاسىل كودتى كورسەتۋى ءتيىس. كورمەنىڭ اشىلۋ سالتاناتىندا قازاقستان پرەزيدەنتى قاسىم-جومارت توقايەۆ قاتىسۋشىلارعا ارناپ، ءسوز سويلەدى. الەمنىڭ 127 ەلىنىڭ وندىرۋشىلەرى كورمەگە ءوز تاۋارلارىن اكەلگەن.
«كەز كەلگەن تاۋاردىڭ ەكسپورتى تۇتىنۋشىعا تاۋەلدى. جۇڭگو نارىعىندا ءار ءونىم ءوز ورنىن تابا الادى. ويتكەنى ول الۋان ءتۇرلى، ءار ءوڭىردىڭ ءوز ەرەكشەلىكتەرى بار. ماسەلەن، شانحايدىڭ ءوز تالعامى بار، ال ورتالىق بولىكتەگى حەنان مەن سىچۋان پروۆينسيالارى جانە باتىستاعى شىڭجان، تيبەت پەن سينحاي ايماقتارىنىڭ تالعامى ەرەكشەلەنەدى. قىسقاسىن ايتقاندا، ءاربىر جاقسى ءونىم جۇڭگو نارىعىندا ءوز ورنىن تابا الادى»، - دەدى قحر كوممەرسيا مينيسترلىگى ەۋروپا مەن ازيا دەپارتامەنتى ديرەكتورىنىڭ ورىنباسارى ليۋ سزيۋن.
كورمە 360 مىڭ شارشى مەتر اۋداندى الىپ جاتىر. ول بىرنەشە ايماققا بولىنگەن. بۇل - ماشينالار، يننوۆاسيالىق تەحنولوگيالار، تۇتىنۋشىلىق تاۋارلار جانە ازىق-تۇلىك ونىمدەرى. ءار ءوندىرۋشى جۇرتتى تاڭقالدىرىپ، نازارىن ءوز ەكسپوزيسياسىنا اۋدارۋعا تىرىسقان. ال باستى تاقىرىبى جاسىل تەحنولوگيالاردى دامىتۋ بولدى. ۇيىمداستىرۋشىلاردىڭ ايتۋىنشا، كورمە قىتايمەن كاسىپ دامىتۋدىڭ ەڭ تەز جولى. جالپى ءۇش مىڭنان استام كاسىپورىن وسى مۇمكىندىكتى پايدالانىپ، ءوز ونىمدەرىن اكەلدى. قولمەن ۇستاۋعا بولاتىن تاۋارلارمەن قاتار، كورەرمەندەرگە دايىن تەحنيكالىق شەشىمدەر دە ۇسىنىلدى.
«وندىرىستە قولدانىلاتىن تەحنولوگيالاردى مەديسينا سالاسىنا بەيىمدەدىك. مىسالعا، زاتتار ينتەرنەتىنىڭ كومەگىمەن مەديسينالىق مەكەمەلەردەگى بارلىق قۇرال-جابدىقتى جۇيەگە قوسىپ، ولاردىڭ جاعدايىن قاداعالاۋعا بولادى. 5Gء-دى پايدالانىپ كومپيۋتەرلىك توموگرافيا نەمەسە ۋزي جاسايتىن قۇرىلعىلاردى باسقارىپ، جوعارى بىلىكتى مامان قاشىقتان دياگنوز قويا الادى. جالپى 5G تەحنولوگيالارى مەديسينالىق مەكەمەلەرگە بيۋدجەتىن قولايلى قۇرىپ، تيىمدىلىگىن ارتتىرۋعا كومەكتەسەدى»، - حالىقارالىق كومپانيانىڭ وكىلى لي گوشۋي.
حالىقارالىق كورمە وتكىزەتىن جەر رەتىندە شانحايدىڭ تاڭدالۋى كەزدەيسوق ەمەس. ول - قىتايدىڭ ماڭىزدى مادەني جانە قارجىلىق ورتالىعى. وعان قوسا ەلدىڭ نەگىزگى ساۋدا-ەكونوميكالىق حابتارىنىڭ ءبىرى. وتكەن جىلى شانحايدىڭ جالپى ىشكى ءونىمى 600 ملرد دوللاردان اسىپ ءتۇستى.