قىتايدا كوروناۆيرۋس جۇقتىرعانداردى ءبىر ورتالىقتا وقشاۋلاپ ۇستاۋ توقتاتىلدى.
قحر-دا ەندى كوروناۆيرۋس ينفەكسياسىن جۇقتىرعاندار ۇيدەن ەمدەلە الادى نەمەسە مەديسينالىق مەكەمەنىڭ كومەگىنە جۇگىنۋىنە بولادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قىتايدا COVID-19-عا شالدىققانداردى كارانتين ورتالىقتارىندا وقشاۋلاۋ الىنىپ تاستالدى. بۇعان دەيىن قحر بيلىگى كوروناۆيرۋستى مۇلدەم تاراتپاۋ ساياساتىن جۇرگىزىپ، بارلىق اكىمشىلىك-ايماقتىق مەكەمەلەرىندە كوروناۆيرۋس ينفەكسياسىن جۇقتىرعان ادامدارعا ارناپ كارانتين ورتالىقتارىن سالعان بولاتىن.
ەندى ناۋقاستارعا اۋرۋحانادان شىققاندا كوروناۆيرۋستىڭ بار-جوعىن انىقتايتىن پتر-تەستتىڭ تەرىس ناتيجەسى قاجەت ەمەس. COVID-19-عا دياگنوستيكا جاساۋ جانە ەمدەۋدىڭ جاڭا حاتتاماسىندا اۋرۋ بۇرىن «جاڭا كوروناۆيرۋس پاندەمياسى» بولسا، ەندى «جاڭا كوروناۆيرۋس ينفەكسياسى» بولىپ وزگەرگەن.
بۇعان دەيىن قحر دەنساۋلىق ساقتاۋ ىستەرى بويىنشا مەملەكەتتىك كوميتەتتىڭ شەشىمى بويىنشا كوروناۆيرۋسقا قارسى كۇرەس شارالارىنىڭ ساناتى ەڭ جوعارعى ا-دان ۆ-عا تۇسكەن بولاتىن.
جۇڭگو اۋرۋلاردى باقىلاۋ جانە الدىن الۋ ورتالىعىنىڭ 2023 جىلدىڭ 6 قاڭتارىنداعى دەرەگىنە سايكەس، قۇرلىقتىق قىتايدا وتكەن تاۋلىكتە 10،6 مىڭ ادام كوروناۆيرۋس جۇقتىرعان. دەنساۋلىق تۋرالى مالىمەت جينايتىن Airfinity بريتاندىق كومپانياسىنىڭ زەرتتەۋى بويىنشا، COVID-تەن تاۋلىگىنە 9 مىڭ ادامعا دەيىن قايتىس بولعان. پاندەميا باستالعالى قحر-دا كوروناۆيرۋستان 5267 ادام قايتىس بولدى.