قىتايدىڭ ۇلتتىق مەتەورولوگيالىق ورتالىعى بەيسەنبى كۇنى ەلدىڭ كوپتەگەن ايماعىندا كۇننىڭ قاتتى ىسۋىنا بايلانىستى بيىلدىققا العاش رەت «قىزعىلت سارى» ەسكەرتۋىن جاريالادى، بۇل – ەكىنشى ورىنداعى جوعارى ءقاۋىپ دەڭگەيى، دەپ حابارلايدى Almaty-akshamy.kz قازاقپارات اگەنتتىگىنە سىلتەمە جاساپ.
ەلدىڭ مەتەورولوگيالىق ورتالىعى 23 ماۋسىمدا كۇندىز سولتۇستىك جۇڭگو جانە حۋانحە مەن حۋايحە وزەنى بويىنداعى ايماقتاردا اۋا تەمپەراتۋراسى 35 گرادۋستان جوعارى بولاتىنىن حابارلادى.
بولجام بويىنشا، حەبەي مەن شاندۋن پروۆينسيالارىنىڭ كەي جەرلەرىندە جانە بەيجىڭ مەن تيانسزين قالالارىندا تەمپەراتۋرا 40 گرادۋسقا جەتۋى مۇمكىن.
كەشە ساعات 9:00-دە بەيجىڭدە اۋا تەمپەراتۋراسىنىڭ جوعارى بولۋىنا بايلانىستى «قىزعىلت سارى» ەسكەرتۋى جاريالاندى. بولجام بويىنشا جۇڭگو استاناسىنىڭ كوپتەگەن اۋداندارىندا اپتاپ ىستىق سەنبىگە دەيىن ساقتالادى.
ايتا كەتسەك، ساعات 8:00 مەن 16:00 ارالىعىندا حەبەي مەن شاندۋن، بەيجىڭ جانە تيانسزين پروۆينسيالارىنىڭ ءبىر بولىگىندە اۋا تەمپەراتۋراسى 40 گرادۋستان اسقان. وسى ءتورت پروۆينسيا ايماعىندا ورنالاسقان 17 مەملەكەتتىك مەتەورولوگيالىق ستانسيا اۋانىڭ رەكوردتىق جوعارى تەمپەراتۋراسىن تىركەدى. بەيجىڭ مەتەورولوگيالىق قىزمەتىنىڭ حابارلاۋىنشا، قالانىڭ وڭتۇستىگىندەگى نانسزياو مەتەورولوگيالىق ستانساسىندا ساعات 15:19-دا اۋا تەمپەراتۋراسى 41،1 گرادۋس بولعان.
قىتايدا جوعارى تەمپەراتۋراعا بايلانىستى ءۇش دەڭگەيلى ەسكەرتۋ جۇيەسى قابىلدانعان: قاۋىپتىلىكتىڭ ەڭ جوعارى دەڭگەيى – قىزىل ءتۇس، ودان كەيىن قىزعىلت سارى جانە سارى ءتۇس.