«قونايەۆ» اكك باسشىلىعى ەكونوميكانىڭ ءتۇرلى سالالارىندا جۇمىس ىستەيتىن جەتەكشى قىتايلىق كومپانيالارمەن كەزدەستى، دەپ حابارلايدى aqshamnews.kz
بۇگىندە قازاقستاندا اۋىل شارۋاشىلىعى تەحنيكاسىنا دەگەن سۇرانىس كۇننەن-كۇنگە ارتۋدا. ساراپشىلاردىڭ پىكىرىنشە، فەرمەرلەر اراسىندا ەڭ كوپ سۇرانىسقا يە تەحنيكانىڭ ءبىرى – ءتۇرلى قۋاتتىلىقتاعى تراكتورلار. قازىرگى كەزدە ەلىمىزدىڭ اۋىل شارۋاشىلىعى تەحنيكاسى پاركىندە شامامەن 150 مىڭ تراكتور مەن 40 مىڭ كومباين بار، ءبىراق ولاردىڭ توزۋ دەڭگەيى 80%-عا جەتكەن.
الماتى وبلىسى اۋىل شارۋاشىلىعى سالاسىندا جەتەكشى وڭىرلەردىڭ ءبىرى. مۇندا كوكونىس، جەمىس، كارتوپ، جۇگەرى، سويا، كۇرىش سياقتى ءارتۇرلى داقىلدار وندىرىلەدى. وبلىستا اۋىل شارۋاشىلىعىنا ارنالعان 4،3 ميلليون گەكتار جەر بار. جايىلىمدار 3،9 ميلليون گەكتاردى، ال ەگىستىك جەرلەر 460 مىڭ گەكتاردى قامتيدى. وسىعان بايلانىستى، قازاقستانداعى اۋىل شارۋاشىلىعى تەحنيكاسى نارىعى ايتارلىقتاي ءوسۋ الەۋەتىنە يە. ساراپشىلار بولاشاقتا بۇل سالادا تەحنيكاعا دەگەن سۇرانىستىڭ ارتۋىن بولجاپ وتىر.
«قونايەۆ» الەۋمەتتىك-كاسىپكەرلىك كورپوراسياسى» اق الماتى وبلىسىنىڭ الەۋمەتتىك-ەكونوميكالىق دامۋىنا جاردەمدەسۋدى ماقسات ەتەدى. نارىق جاعدايىن ەسكەرە وتىرىپ، اكك باسشىلىعى ينۆەستيسيالار تارتۋ جانە ۇزاق مەرزىمدى ارىپتەستىك قاتىناستار ورناتۋ بويىنشا جۇمىستار جۇرگىزەدى. قىتايلىق سەرىكتەستەر قازاقستاندا، اسىرەسە الماتى وبلىسىندا جوبالاردى ىسكە اسىرۋعا قىزىعۋشىلىق تانىتتى.
ساپار بارىسىندا اكك وكىلدەرى چجەنسزيان قالاسىندا اۋىل شارۋاشىلىعى تەحنيكاسىن وندىرەتىن FMWorld جانە Jiangsu Hongdou Energy Technology Co، Ltd كومپانيالارىنىڭ زاۋىتتارىن ارالادى. زاۋىتتار از قۋاتتى تراكتورلاردان باستاپ قازىرگى زامانعى كومبايندار مەن اۋىل شارۋاشىلىعى دروندارىنا دەيىن شىعارادى. جۇڭگو تاراپى الماتى وبلىسىندا ماشينا-تراكتور زاۋىتىن سالىپ، ءوندىرىستى 80%-عا دەيىن جەرگىلىكتى دەڭگەيدە وقشاۋلاۋ مۇمكىندىگىن قاراستىرۋدا.
«اكك ءبىزدىڭ ءوڭىر تۇرعىندارىنىڭ ءال-اۋقاتىن جاقسارتۋعا باعىتتالعان مەملەكەتتىك باعدارلامالاردى جۇزەگە اسىرۋدا. وسى كەزدەسۋدە ءبىز ءۇشىن الماتى وبلىسىندا تراكتورلار مەن كومبايندار ءوندىرىسىن جولعا قويۋ وتە ماڭىزدى بولدى. بۇل ءونىمنىڭ وزىندىك قۇنىن تومەندەتىپ، ازىق-تۇلىك شىعىندارىنىڭ ازايۋىنا ىقپال ەتەدى»، – دەپ اتاپ ءوتتى «قونايەۆ» اكك باسقارما ءتوراعاسى مۇرات ءابدىعۇلوۆ.
سونىمەن قاتار، الماتى وبلىسىندا جاڭا تۇرعىن ءۇي سالۋ جانە ەسكى ۇيلەردى جاڭارتۋ قاجەتتىگى تۋىنداپ وتىر. شانحاي قالاسىندا CNECC (China Nuclear Engineering Construction Corporation) كومپانياسىنىڭ وكىلدەرىمەن كەزدەسۋ وتكىزىلىپ، الماتى وبلىسىنداعى قۇرىلىس جوبالارى بويىنشا ىنتىماقتاستىق ماسەلەلەرى تالقىلاندى. كومپانيانىڭ ءىرى قۇرىلىس جانە ينفراقۇرىلىم نىساندارىن جۇزەگە اسىرۋداعى تاجىريبەسى مول. بۇل سالاداعى سەرىكتەستىك تۇرعىن ءۇي قورىنىڭ جاڭعىرتىلۋىنا، تۇرعىنداردىڭ ءومىر ساپاسىن ارتتىرۋعا جانە زاماناۋي ينفراقۇرىلىم قۇرۋعا نەگىز بولماق.
كەلىسسوزدەر ناتيجەسىندە، اكك مەن جۇڭگو كومپانيالارى اراسىندا ءوزارا تۇسىنىستىك جانە ىنتىماقتاستىق تۋرالى مەموراندۋمدارعا قول قويىلدى. قۇجاتتارعا قول قويۋ ءوڭىردىڭ تۇراقتى دامۋىن قامتاماسىز ەتەتىن ۇزاق مەرزىمدى سەرىكتەستىككە باستاما بەرەدى.