قاۋلى جوباسى 26 ساۋىرگە دەيىن قوعام تالقىلاۋىندا بولادى
«اشىق نقا» پورتالىندا قازاقستان مەن جۇڭگو حالىق ۇكىمەتتەرىنىڭ اراسىنداعى ۆيزالىق تالاپتاردان ءوزارا بوساتۋ تۋرالى كەلىسىمگە قول قويۋ تۋرالى قاۋلى جوباسى جاريالاندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل قۇجات قازاقستان ازاماتتارىنىڭ جۇڭگو اۋماعىندا، جۇڭگو ازاماتتارىنىڭ قازاقستان اۋماعىندا 30 كۇننەن اسپايتىن مەرزىمدە ۆيزاسىز جۇرۋىنە مۇمكىندىك بەرۋدى كوزدەيدى.
«قوسا بەرىلىپ وتىرعان قازاقستان رەسپۋبليكاسىنىڭ ۇكىمەتى مەن جۇڭگو حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىمنىڭ جوباسى ماقۇلدانسىن»، - دەلىنگەن قاۋلى جوباسىندا.
اتالمىش كەلىسىمنىڭ 1-بابىندا 30 كۇندىك ۆيزاسىز رەجيم قانداي ماقساتپەن قاتىنايتىن ازاماتتارعا بەرىلەتىنى ايتىلعان.
«ۋاعدالاسۋشى تاراپتاردىڭ ءبىرى مەملەكەتىنىڭ ازاماتتارى وسى كەلىسىمنىڭ 2-بابىندا كورسەتىلگەن جارامدى جول ءجۇرۋ قۇجاتتارىنىڭ يەلەرى جەكە ىستەردى، ءتۋريزمدى، ەم قابىلداۋدى، حالىقارالىق تاسىمالداردى، ترانزيتتىك، سونداي-اق ىسكەرلىك ماقساتتاردى (كەلىسىم-شارتتار جاساسۋ، كەلىسسوزدەر جۇرگىزۋ، كونسۋلتاسيالىق قىزمەتتەر كورسەتۋ جانە باسقا دا ىسكەرلىك ماقساتتار) جۇزەگە اسىرۋ ماقساتىمەن ەكىنشى ۋاعدالاسۋشى تاراپ مەملەكەتىنىڭ اۋماعىنا مەملەكەتتىك شەكارانى كەسىپ وتكەن ساتتەن باستاپ كۇنتىزبەلىك 30 (وتىز) كۇننەن اسپايتىن مەرزىمگە، كۇنتىزبەلىك 180 (ءجۇز سەكسەن) كۇن ىشىندە جيىنتىعىندا كۇنتىزبەلىك 90 (توقسان) كۇننەن اسپايتىن ءبىر مارتە نەمەسە كوپ مارتە كەلۋ، كەتۋ، ۋاقىتشا بولۋ ءۇشىن ۆيزالىق تالاپتاردان بوساتىلادى»، - دەپ جازىلعان كەلىسىم ماتىنىندە.
ياعني، ساپارلاۋشى ازاماتتار 30 كۇندىك ۆيزاسىز رەجيم اياسىندا ەكىنشى ەلگە 180 كۇننىڭ ىشىندە 90 كۇننەن ارتىق بولا المايدى.
قاۋلى ماتىنىندەگى مالىمەت بويىنشا، 18-19 مامىردا بۇل كەلىسىمگە قازاقستان پرەزيدەنتىنىڭ جۇڭگو حالىق رەسپۋبليكاسىنا مەملەكەتتىك ساپار بارىسىندا قول قويىلماق. قۇجاتقا ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ مەن جۇڭگو حالىق رەسپۋبليكاسى سىرتقى ىستەر ءمينيسترى سين گان قول قويادى دەپ جوسپارلانعان.
قاۋلى جوباسى 26 ساۋىرگە دەيىن قوعام تالقىلاۋىندا بولادى.