الماتىداعى اينالما تەمىرجولى بويىندا ءىرى جاڭا ساۋدا حابىن سالۋ جوسپارلانۋدا
الماتى اگلومەراسياسىندا سالىنىپ جاتقان اينالما تەمىرجولى بويىندا ءىرى ساۋدا-لوگيستيكالىق حاب سالۋ جوسپارلانۋدا، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جۇڭگو تاراپىنان ترانزيتتىك جانە يمپورتتىق جۇكتەردىڭ ۇلكەن اعىنىن ەسكەرە وتىرىپ، ءبىز الماتى تورابى ءوز دەڭگەيىندە جۇمىس ىستەپ جاتقانىن كورىپ وتىرمىز. ءبىز قازىرگى تاڭدا ۇزىندىعى 73 شاقىرىم اينالما تەمىر جول قۇرىلىسىن سالۋ تۋرالى باستاما كوتەردىك. ول قازاقستان-تۇرىكمەنستان-يران (كتي) باعىتى بويىنشا ورتا ازياعا تۇركىمەنستان مەن يرانعا اپاراتىن ترانزيتتىك جۇكتەردىڭ وتكىزۋ قابىلەتىن ارتتىرادى»، - دەدى «قازاقستان تەمىر جولى» ۇلتتىق كومپانياسى ءتوراعاسىنىڭ ورىنباسارى ەرلان قويشىبايەۆ الماتىدا وتكەن كولىك-لوگيستيكا الەۋەتىن دامىتۋ جونىندەگى بيزنەس-كونفەرەنسيادا.
ونىڭ ايتۋىنشا، الماتىداعى اينالما تەمىرجولى بويىندا ءىرى جاڭا ساۋدا حابىن سالۋ جوسپارلانۋدا.
«ءورشىل جوبالاردىڭ ءبىرى رەتىندە الماتىنىڭ اينالما تەمىرجولى بويىندا ءىرى ساۋدا حابىن سالۋ بولىپ تابىلادى. ءبىز بۇل جوبا اياسىندا بوند قويمالارى، سۋىق تىزبەكتەر (توڭازىتقىش تىزبەگى) سالىنادى دەپ وتىرمىز، جۇك اۋەجايى، اۆتو، تەمىرجول جانە قۇرعاق پورتتىڭ قۇرىلىسى دا قاراستىرىلۋدا. ءبىز ەگجەي-تەگجەيلى ازىرلەنگەن سوڭ تەحنيكالىق-ەكونوميكالىق نەگىزدەمە مەن بيزنەس-جوسپارىن كورسەتەتىن بولامىز. ءقازىر الدىن الا جۇمىس ىستەپ جاتىرمىز جانە ينۆەستورلاردى بۇل جوباعا قاتىسۋعا شاقىرامىز»، - دەدى ەران قويشىبايەۆ.
قتج وكىلدەرىنىڭ ايتۋىنشا، جوبا تابىستى ىسكە اسقان جاعدايدا الماتى حابى تاياۋ شىعىس، كاۆكاز جانە ورتالىق ازيا نارىعىنا شىعۋ ءۇشىن پايدالانىلۋى مۇمكىن.