جۇڭگو كوروناۆيرۋسپەن الەمدى قايتا الاڭداتا باستادى

قىتايدا كوروناۆيرۋستان 5241 ادام قايتىس بولعان.

بەيجىڭ الداعى ەكى اپتادا COVID-19 ينفەكسياسىن جۇقتىرۋ وقيعالارىنىڭ اۋىر جاعدايلارىنا تاپ بولادى. مۇنى شەتەلدىك جانە جەرگىلىكتى رەسپيراتورلىق ساراپشىلار بولجاپ وتىر، دەپ حابارلايدى Almaty-akshamy.kz Inbusiness.kz  cىلتەمە جاساپ.

ال، قىتايدىڭ كۇتپەگەن جەردەن اسا قاتال انتيۆيرۋستىق ساياساتتان باس تارتۋىنىڭ الەمدىك ەكونوميكاعا ىقتيمال زارداپتارى مەن سالدارلارى قانداي بولۋى مۇمكىن؟ ءقازىر بۇل ماسەلەلەر دە ۇلكەن الاڭداۋشىلىققا سەبەپشى.

اۋقىمدى نارازىلىقتاردان كەيىن، 1، 4 ملرد حالقى بار ەل وسى ايدا ءوزىنىڭ "نولدىك-COVID" رەجيمىن بۇزا باستادى. بۇل ساياسات قحر-دى ۇلكەن ەكونوميكالىق جانە پسيحولوگيالىق شىعىندارعا ۇشىراتسا دا، ۆيرۋستىڭ تارالۋىن ءۇش جىل بويى ايتارلىقتاي تەجەپ كەلدى.

دەگەنمەن، كارانتيندىك شەكتەۋلەردىڭ كەنەتتەن بوساڭسۋى قىتايدا كوروناۆيرۋسقا شالدىعۋ فاكتىلەرىنىڭ كۇرت وسۋىمەن تۇسپا-تۇس كەلىپ وتىر. كەيبىر ساراپشىلاردىڭ ايتۋىنشا، قىتايدا وسى ىندەتتەن كەلەسى جىلى ميلليوننان استام ادام قايتىس بولۋى مۇمكىن.

پاندەميا باستالعالى قىتايدا كوروناۆيرۋستان 5241 ادام قايتىس بولعان. Global Times گازەتى رەسپيراتورلىق ساراپشىلار مەن ەپيدەميولوگتارعا سىلتەمە جاساپ حابارلاعانداي، بۇل سان تاياۋدا كۇرت ءوسۋى عاجاپ ەمەس.

"ءبىز تەز ارەكەت ەتىپ، رەسۋرستارىمىز بەن كلينيكالاردى جاعدايى اۋىر ناۋقاستاردى ەمدەۋگە شۇعىل دايىنداۋىمىز كەرەك"، - دەيدى بەيجىڭ ۋنيۆەرسيتەتىنىڭ ءبىرىنشى اۋرۋحاناسىنىڭ رەسپيراتورلىق مامانى ۆان گۋانفا اتالعان باسىلىمعا بەرگەن سۇحباتىندا.