قىتايدىڭ جەتەكشى حيميكتەرى جوعارى تىعىزدىقتاعى پوليەتيلەندى دەپوليمەريزاسيالاۋ (بولشەكتەۋ) كاتاليزاتورى رەتىندە كەۋەكتى سەوليتتى ءساتتى قولدانا العان.
بۇل جايىندا islam.kz پورتالى N + 1 اقپارات كوزىنە جانە Nature Chemistry مەرزىمدى باسىلىمىنا سىلتەمە جاساي وتىرىپ ءمالىم ەتەدى، دەپ حابارلايدى Almaty-akshamy.kz.
عالىمداردىڭ بۇل جاڭالىعى ءوز كەزەگىندە پوليەتيلەننەن جوعارى وكتاندىق سانى 88 بولاتىن تارماقتالعان الكانداردىڭ (الكاندار — مولەكۋلا قۇرامىنداعى كومىرتەك اتومدارى ءوزارا تەك دارا σ-بايلانىستار ارقىلى بايلانىسقان جالپى فورمۋلاسى CnH2n+2 بولاتىن اليفاتتى قانىققان كومىرسۋتەكتەر – ۋيكيپەديا ەلەكتروندى ەنسيكلوپەديادان) قوسپالارىن الۋدا، سونىمەن قاتار، دەپوليمەرلەنۋ پروسەسىن زەرتتەۋدە پايدالانۋعا بولادى. اتالمىش ءادىستىڭ ەڭ باستى ارتىقشىلىعى قوسىمشا رەاگەنتتەردى (رەاگەنت - رەاكسيا ورىن السا، حيميالىق رەاكسيا نەمەسە سىناۋ تۋدىراتىن جۇيەگە قوسىلعان قوسپا نەمەسە قوسپاسى. رەاگەنت رەاكسيانىڭ پايدا بولۋىنا سەبەپ بولاتىن ناقتى حيميالىق زات بار-جوقتىعىن انىقتاۋ ءۇشىن پايدالانىلۋى مۇمكىن - kk.eferrit.com دەرەك كوزىنەن) مەيلىنشە از قولدانۋىندا جاتىر.
پوليەتيلەن – ءبىرىڭعاي بايلانىس ارقىلى قوسىلعان كومىرتەگى اتومدارىنىڭ ۇزىن تىزبەگىنەن تۇراتىن پوليمەر. ول مىقتىلىعىنا ءارى ءتۇرلى حيميالىق اسەرلەرگە توزىمدىلىك تانىتۋىنا بايلانىستى وراۋ نەمەسە قاپتاۋ ماتەريالدارىن وندىرۋدە كەڭىنەن قولدانىلادى. قاراپايىم پوليەتيلەن بەيورگانيكالىق قىشقىلدارمەن جانە سىلتىلەرمەن ارەكەتتەسپەيدى. بۇگىنگى تاڭدا دۇنيەجۇزىلىك حيميا ونەركاسىبى جىلىنا 100 ميلليون تونناعا جۋىق پوليەتيلەن وندىرەدى. سوندىقتان ونى ءتيىمدى وڭدەۋ تاسىلدەرىن ىزدەستىرۋ عىلىمي قوعامداستىقتىڭ ماڭىزدى مىندەتىنە كىرگەن. جۇڭگو عىلىم اكادەمياسىنىڭ حيميا ينستيتۋتىنىڭ حان بۋسين باستاعان عالىمدار توبى پوليەتيلەندى تارماقتالعان الكاندار قوسپاسىنا اينالدىرۋ ءۇشىن LSP-Z100 كەۋەكتى سەوليتى ارقىلى يننوۆاسيالىق شەشىم ويلاپ تاپتى.
الىنعان ءونىمدى اۆتوكولىك وتىنى رەتىندە ءساتتى پايدالانۋعا بولادى، بۇل پلاستيك قالدىقتارىن قايتا وڭدەۋ سالاسىن جاڭا بەلەسكە كوتەرەدى.