ساۋدا جانە ينتەگراسيا ءمينيسترى ارمان شاققالييەۆ بەيجىڭدە قحر باس كەدەن باسقارماسى باسشىسىنىڭ ورىنباسارى سۋن يۋينينمەن كەلىسسوز وتكىزدى، دەپ حابارلايدى almaty-akshamy.kz.
تاراپتار مال جانە وسىمدىك شارۋاشىلىعى ونىمدەرىنىڭ ەكسپورتتىق تاۋارلارىنىڭ نومەنكلاتۋراسىن كەڭەيتۋ ماسەلەلەرىن تالقىلادى.
ارمان شاققالييەۆ ءوز سوزىندە ءبىرقاتار تاۋارلار بويىنشا قىتايلىق كومپانيالار مەن قحر-عا ەكسپورتتاۋدى جوسپارلاپ وتىرعان ءبىزدىڭ كاسىپكەرلەر تاراپىنان جوعارى سۇرانىس بار ەكەنىن اتاپ ءوتتى.
«ءبىز قازاقستاندا بىرنەشە رەت بولعان كوپتەگەن قىتايلىق كومپانيالارمەن كەزدەسۋلەر وتكىزدىك، ولار سيىر ەتى، قوي ەتى، تاۋىق جانە سۋبونىمدەر ساتىپ الۋعا دايىن. ينۆەستيسيالىق ىنتىماقتاستىق بويىنشا كەلىسسوزدەر جۇرگىزىلۋدە، ءىرى قىتايلىق كومپانيالار جۇڭگو نارىعىنا ودان ءارى ەكسپورتتاۋ ماقساتىندا قازاقستاننىڭ ەت ءوندىرىسى ءۇشىن وراسان زور قاراجات سالۋعا دايىن. ءبىراق قاجەتتى جاعداي جاساۋ ءۇشىن قولدا بار شەكتەۋلەردى الىپ تاستاپ، ەت ونىمدەرىن ەكسپورتتاۋدى قايتا باستاۋ قاجەت»، — دەدى ارمان شاققالييەۆ.
ايتا كەتۋ كەرەك، قحر باس كەدەن باسقارماسى اۋسىل جانە قۇس تۇماۋى اۋرۋلارىن باقىلاۋ بويىنشا قازاقستاننىڭ ۆەتەرينارلىق قىزمەتىن باعالاۋ ءۇشىن ەلگە كەلۋگە دايىن.
«ءبىز سونداي-اق سالقىنداتىلعان ەت ونىمدەرىنىڭ، تەرميالىق وڭدەلگەن ەت ونىمدەرىنىڭ، قۇستىڭ ەتى مەن سۋبونىمدەرىنىڭ، تاعامدىق جۇمىرتقالاردىڭ، جىلقى ەتىنىڭ جانە باسقا دا تاۋار تۇرلەرىنىڭ ەكسپورتىنا قويىلاتىن تالاپتاردى كەلىسۋ بويىنشا جۇمىستى باستاۋعا دايىنبىز»، — دەدى كەزدەسۋ بارىسىندا قازاقستان ساۋدا مينيسترلىگىنىڭ باسشىسى.
كەلىسسوز بارىسىندا ءوزارا ساۋداداعى كەدەرگىلەردى جويۋ جونىندە كەلىسىم جاسالدى.
قحر باس كەدەن باسقارماسى قازاقستاننان تەرميالىق وڭدەلگەن ەت ونىمدەرىن جەتكىزۋگە قويىلعان شەكتەۋدى الىپ تاستاۋعا دايىن ەكەنىن ءبىلدىردى.
قحر نارىعىندا قازاقستاندىق تۇيە ءسۇتى ۇلكەن سۇرانىسقا يە. جۇڭگو تۇتىنۋشىسى بۇل ءونىمنىڭ ءدامى مەن ساپاسىن بىلەدى.
قازاقستاننىڭ بيە ءسۇتىن ەكسپورتتاۋ بويىنشا ۇلكەن الەۋەتى بار.
الايدا، قحر-دا وسى ءونىمدى نارىققا جەتكىزۋ ءۇشىن ءتيىستى ۇلتتىق ستاندارت ازىرلەۋ قاجەت، بۇل تۋرالى كەلىسسوزدەر بارىسىندا دا ايتىلدى.
ەكسپورتتىڭ تاعى ءبىر ماڭىزدى باعىتى — وسىمدىك شارۋاشىلىعى ونىمدەرى. قازاقستان قىتايعا سۇيەكتىجەمىس داقىلدارىن (شابدالى، ورىك، شيە) جىبەرۋگە دايىن.
بۇرشاق جانە جاسىمىق بويىنشا الەۋەتتى ەكسپورتتاۋشىلاردىڭ ءتىزىمى جاسالدى.
«ءبىز س ۇلى ۇلپەگى، قىزىلشا سەلليۋلوزاسى مەن كارتوپ، جارما، كۇنباعىس تۇقىمىنىڭ شروتى، ماقسارى بويىنشا ەكسپورتتى ارتتىرۋعا دايىنبىز»، — دەدى ارمان شاققالييەۆ.
كەزدەسۋ قورىتىندىسى بويىنشا بيىل جۇڭگو دەلەگاسياسى كەلەتىن بولدى. ول ءۇشىن جاقىن ارادا ساپار باعدارلاماسى كەلىسىلەدى.
ساپار قورىتىندىسى بويىنشا جۇڭگو تاراپى شەكتەۋدى الىپ تاستاپ، مال شارۋاشىلىعى ونىمدەرىنىڭ ەكسپورتىن تالقىلاۋعا كوشۋگە دايىن.
سونىمەن قاتار، جۇڭگو تاراپى تەرميالىق وڭدەلگەن سيىر ەتىنە، قوي ەتىنە جانە قۇس ەتىنە قويىلاتىن ۆەتەرينارلىق تالاپتاردى كەلىسۋ بويىنشا جۇمىستى قاتار باستاۋعا كەلىسەدى.