بولجام بويىنشا وزبەكستان حالقىنىڭ سانى 2030 جىلعا قاراي 40 ملن-عا جەتەدى. بۇل تۋرالى وزبەكستان وليي ءماجىلىسى مەن سەناتى جانە بۇۇ اگەنتتىكتەرىنىڭ قولداۋىمەن ۇيىمداستىرىلعان «ازىق-تۇلىك قاۋىپسىزدىگىن قامتاماسىز ەتۋ جانە اۋىل شارۋاشىلىعىنىڭ تۇراقتى دامۋىنا قولداۋ كورسەتۋ» اتتى سەمينار بارىسىندا ءمالىم بولدى، دەپ حابارلايدى almaty-akshamy.kz Kazinform -گە سىلتەمە جاساپ.
وزبەكستان رەسپۋبليكاسى سەناتى باسپا ءسوز قىزمەتىنىڭ حابارلاۋىنشا، سەمينار وسى ەلدە بۇۇ تۇراقتى دامۋ ماقساتتارى ايلىعىنىڭ اياسىندا ۇيىمداستىرىلدى.
ءىس-شاراعا شەتەلدىك ساراپشىلار، حالىقارالىق ۇيىمداردىڭ وكىلدەرى، پارلامەنت دەپۋتاتتارى، مينيسترلىكتەر مەن ۆەدومستۆولاردىڭ وكىلدەرى قاتىستى.
سەميناردا ازىق-تۇلىك قاۋىپسىزدىگى ماسەلەسى تالقىلاندى. سونداي-اق استىق كولەمىنىڭ كەمۋى، كۇن وتكەن سايىن قيىنداپ بارا جاتقان سۋ تاپشىلىعى، جەردىڭ قۇنارسىزدانۋى، سونداي-اق تۇرعىندار سانىنىڭ ارتۋ ماسەلەلەرى تالقىلاندى.
«وزبەكستان ءۇشىن تاۋەكەلدەردىڭ ءبىرى تۇرعىندار سانىنىڭ كۇرت وسۋىمەن بايلانىستى بولىپ وتىر. كەيىنگى 30 جىلدا مۇنداعى حالىق سانى 15 ملن ادامعا ارتىپ، بۇگىندە 36 ميلليوننان اسقان. بولجام بويىنشا 2030 جىلعا قاراي وزبەكستان تۇرعىندارىنىڭ سانى 40 ملن ادامعا جەتەدى»،-دەپ حابارلايدى ءور سەناتىنىڭ باسپا ءسوز قىزمەتى.
سونداي-اق جيىندا كليماتتىڭ وزگەرۋى سالدارىنان جانە وزگە دە سەبەپتەر بويىنشا سۋ رەسۋرستارىنىڭ سارقىلۋى سۋ رەسۋرستارىن باسقارۋدا بەلسەندى ارەكەت ەتۋ، سۋ ۇنەمدەيتىن تەحنولوگيالاردى ەنگىىپ، قوسىمشا سۋ كوزدەرىن قاراستىرۋدى قاجەت ەتىپ وتىرعاندىعى ايتىلدى.
ال جەردىڭ قۇنارسىزدانۋى مەن شولەيتتەنۋى اۋىل شارۋاشىلىعى سالاسىنىڭ تۇراقتى دامۋى مەن ەكولوگيالىق تۇراقتىلىققا كەر اسەر ەتىپ وتىر.
ايتىلعاندارعا قوسا بايانداما جاساۋشىلار وزبەكستاننىڭ كەيىنگى جىلدارى ازىق-تۇلىك قاۋىپسىزدىگىن قامتاماسىز ەتۋدە جەتىستىككە جەتكەن 10 ەلدىڭ اراسىندا الدىڭعى قاتاردى تۇرعانىن اتاپ ءوتتى. مۇنداي جەتىستىك باقشا ونىمدەرى، كارتوپ، كوكونىستەر، ءجۇزىم، جەمىستەر ەگىستىگى كولەمىنىڭ ۇلعايتىلۋىمەن جانە مال شارۋاشىلىعىنىڭ دامۋىمەن بايلانىستى مۇمكىن بولىپ وتىر.