بۇگىننەن باستاپ قىتايدا شەكارا ايماقتارىندا كىرۋگە جانە شىعۋعا رۇقسات قاعازىن جاساۋ باستالادى.
2023 جىلدىڭ 8 قاڭتارىنان باستاپ قىتايعا كەلگەندەر COVID-19 بويىنشا مىندەتتى كارانتيندە جاتپايتىن بولدى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
جاڭا ەرەجەگە سايكەس، قحر اۋماعىنا كىرۋ ءۇشىن كەلەردەن 48 ساعات بۇرىن تاپسىرىلعان، كوروناۆيرۋستىڭ جوق ەكەنىن دالەلدەيتىن تەست ناتيجەسىن كورسەتۋ جەتكىلىكتى. كوروناۆيرۋس انىقتالماعان جاعدايدا، ولار قىتايعا دەنساۋلىق جاعدايى تۋرالى كەدەندىك دەكلاراسيانى تولتىرۋ كەزىندە قحر-دىڭ شەتەلدەگى ديپلوماتيالىق وكىلدىگىنەن دەنساۋلىق كودىن سۇراتپاي كىرە الادى. ال پتر-تەست ۆيرۋستىڭ بار ەكەنىن كورسەتسە، ساپارىن جازىلعانشا شەگەرە تۇرۋدى ۇسىنادى.
2022 جىلدىڭ جەلتوقسانىنىڭ سوڭىندا قحر دەنساۋلىق ساقتاۋ ىستەرى مەملەكەتتىك كوميتەتى COVID-19-دى «ا» جوعارى ساناتتى ينفەكسيالىق اۋرۋلار تىزىمىنەن الىپ تاستاعانىن حابارلادى. وسىعان بايلانىستى 8 قاڭتاردان باستاپ كوۆيدكە قارسى شەكتەۋلەر مەن قىتايعا كەلگەن اۋە رەيستەرى مەن جولاۋشىلارعا قويىلعان تالاپتار، سونداي-اق ءبىر ورتالىققا كارانتينگە جاتقىزۋ مەن كوروناۆيرۋستىڭ بار-جوعىن انىقتايتىن پتر-تەست تاپسىرۋ الىنىپ تاستالادى.
جۇڭگو 24، 72 جانە 144 ساعات ىشىندەگى ۆيزاسىز ترانزيت شارالارىن قالپىنا كەلتىرىپ، ەلگە ۋاقىتشا كىرۋگە رۇقسات بەرەدى.
سونىمەن قاتار، جۇڭگو بيلىگى قۇرلىقتاعى شەكارا بەكەتتەرى ارقىلى بايلانىسۋدى قالپىنا كەلتىرەدى. 8 قاڭتاردان باستاپ ەلدىڭ شەكارا ايماقتارىندا كىرۋگە جانە شىعۋعا رۇقسات قاعازىن جاساۋ باستالدى.
وعان قوسا، بۇگىننەن باستاپ قحر ازاماتتارىنان شەتەلگە تۋريست رەتىندە ساپارلاۋ ءۇشىن پاسپورت الۋعا ءوتىنىش قابىلداۋ قايتا جانداندى.
قۇرلىقتىق جۇڭگو مەن گونكونگ اراسىنداعى قاراپايىم جولاۋشىلار تاسىمالى دا قالپىنا كەلتىرىلدى.
وتكەن اپتادا ونداعان ەل قىتايدان كەلەتىن جولاۋشىلارعا COVID-19 تەستىن تاپسىرۋدى ەنگىزدى، بەيجىڭ بۇل ارەكەتتى سىنعا الدى. اقش، فرانسيا، اۋستراليا، كانادا، ۇلىبريتانيا، جاپونيا مەن ينديا قىتايدان كەلەتىن ازاماتتارعا COVID-19-دى انىقتايتىن تەستتى جانە باسقا دا ەرەجەلەردى مىندەتتەدى. ماروككو ەڭ قاتاڭ شارالاردىڭ ءبىرىن قولداندى – قىتايدان كەلگەن ساياحاتشىلاردىڭ بارىنە ەلگە كىرۋگە تىيىم سالدى.
بۇعان دەيىن قىتايدا كۇن سايىن كوۆيد تۋرالى دەرەكتەردى جاريالاۋدى توقتاتقان بولاتىن. دەنساۋلىق تۋرالى مالىمەت جينايتىن Airfinity بريتاندىق كومپانياسىنىڭ زەرتتەۋى بويىنشا، قىتايدا COVID-تەن قايتىس بولعاندار سانى كۇنىنە 9 مىڭ ادامعا دەيىن جەتكەن.