جۇڭگو اقش-تى حالىقارالىق تاجىريبەنى بۇزدى دەپ ايىپتادى

جۇڭگو پەنتاگون اتىپ تۇسىرگەن زوندقا بايلانىستى نارازىلىق ءبىلدىردى.

 قحر اتلانت مۇحيتى ۇستىندە F-22 جويعىشى اتىپ قۇلاتقان زوندقا بايلانىستى اقش-تى ايىپتاپ وتىر، دەپ حابارلايدى اlmaty-akshamy.kz  Deutsche Welle باسىلىمىنا سىلتەمە جاساپ.

بەيجىڭ ۆاشينگتوننىڭ امەريكا قۇراما شتاتتارىنىڭ اۋماقتىق سۋىنىڭ ۇستىندەگى نىساندى اتىپ ءتۇسىرۋ شەشىمىن ايىپتادى. بەيمالىم نىساندى ۆاشينگتون «قىتايلىق بارلاۋشى زوند» دەپ اتاعان ەدى.

مۇنى جۇڭگو سىرتقى ىستەر مينيسترلىگىنىڭ جەكسەنبى كۇنى جاريالاعان مالىمدەمەسىنەن كورۋگە بولادى.

قحر اقش-تى «شامادان تىس رەاكسيا كورسەتىپ، حالىقارالىق تاجىريبەنى ورەسكەل بۇزدى» دەپ ايىپتاپ وتىر.

بەيجىڭ «پيلوتسىز باسقارىلاتىن ۇشۋ اپپاراتى» دەپ سيپاتتاعان نىسانعا اقش-تىڭ شابۋىل جاساپ، كۇش قولدانۋىنا جۇڭگو بارىنشا نارازى جانە قارسى» دەيدى ۆەدومستۆو.

قحر ءسىم ءارى قاراي ءتيىستى جاۋاپ قايتارۋ قۇقىعىن وزىنە قالدىرادى.

ەسكە سالايىق، 4 اقپاندا اقش وڭتۇستىك كارولينا جاعالاۋىندا اتلانت مۇحيتىنىڭ ۇستىنەن ۇشىپ بارا جاتقان جۇڭگو اەروستاتىن اتىپ تۇسىرگەن بولاتىن.

بۇعان دەيىن اقش اسپانىندا جۇمباق شار پايدا بولىپ، ونى پەنتاگون تىڭشىلىق جاساپ جۇرگەن قىتايدىڭ وبەكتىسى دەپ مالىمدەگەن.

بەيجىڭ مۇنىڭ قاتە ەكەنىن ايتىپ، اسىعىس شەشىم قابىلداماۋعا شاقىردى.