ۇكىمەت وتىرىسىندا ولجاس بەكتەنوۆ ەلىمىزدىڭ 12 ءوڭىرى زارداپ شەككەن تاسقىنىنىڭ اۋقىمىن اتاپ ءوتتى.
«جاعدايدى مەملەكەت باسشىسى ءوزىنىڭ جەكە باقىلاۋىندا ۇستاپ وتىر. اپاتپەن كۇرەسۋگە قولداعى بارلىق رەسۋرستار مەن كۇشتەر جۇمىلدىرىلدى. مەملەكەتتىك ورگانداردىڭ، ءىرى بيزنەس وكىلدەرىنىڭ، بەلسەندى ازاماتتار مەن ەرىكتىلەردىڭ بىرلەسكەن كۇش-جىگەرىنىڭ ارقاسىندا اۋقىمدى جۇمىس جۇرگىزىلدى. قاجەتتى مەديسينالىق جانە پسيحولوگيالىق كومەك كورسەتىلدى. ادامدار ۋاقىتشا باسپانامەن، تاماقپەن جانە كۇندەلىكتى ومىرگە قاجەتتى زاتتارمەن قامتاماسىز ەتىلدى. بۇكىل حالىق بولىپ مەملەكەت باسشىسىنىڭ ۇندەۋىنە قۇلاق اسىپ، سۋ باسقان وڭىرلەرگە قول ۇشىن سوزدى. بارىنە جاردەم بەرىلدى»، — دەپ اتاپ ءوتتى ولجاس بەكتەنوۆ.
زارداپ شەككەندەرگە قاجەتتى كومەك كورسەتىلدى. ماسەلەن، ءوتىنىش بەرگەن بارلىق وتباسى 100 اەك مولشەرىندە ءبىرجولعى تولەم الدى. كەلتىرىلگەن زالالدى باعالاۋ جۇمىستارىنان سوڭ قيراعان نەمەسە بۇلىنگەن مۇلىك ءۇشىن 150 اەك-كە دەيىن وتەماقى تولەندى. سونىمەن قاتار وتباسىلارعا 9 مىڭنان استام ءۇيدى جوندەۋگە قاراجات تولەنىپ، نارىقتان 6 مىڭعا جۋىق پاتەر مەن ءۇي ساتىپ الىندى. بۇگىنگى تاڭدا 2 576 ءۇي سالىندى، اقمولا جانە باتىس قازاقستان وبلىستارىنداعى 104 نىساندا جۇمىستار بىتۋگە جاقىن. ۇكىمەت باسشىسى جاڭا تۇرعىن ۇيلەردى تەز ارادا اياقتاپ، باسپانالاردى تۇرعىندارعا تاپسىرۋ قاجەتتىگىنە نازار اۋداردى.