25 مىڭ شاقىرىم رەسپۋبليكالىق ماڭىزى بار اۆتوموبيل جولىنا قىسقى كۇتىپ ۇستاۋ جۇمىسى جۇرگىزىلۋدە.
ەلىمىزدە قىس مەزگىلى باستالعاننان بەرى جولشىلار قار قۇرساۋىنان 4 مىڭعا جۋىق كولىك قۇرالىن شىعارىپ، 8 مىڭنان استام جولاۋشىعا كومەك كورسەتتى. بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتى مالىمدەدى، دەپ حابارلايدى Almaty-akshamy.kz.
25 مىڭ شاقىرىم رەسپۋبليكالىق ماڭىزى بار اۆتوموبيل جولىنا قىسقى كۇتىپ ۇستاۋ جۇمىسى جۇرگىزىلۋدە. بۇل جۇمىستارعا 1400-دەن استام قار تازالاۋ تەحنيكاسى جۇمىلدىرىلعان. دەسە دە، رەسپۋبليكالىق جولداردا ءالى دە تەحنيكا جەتىسپەۋشىلىگى بايقالادى. مامانداردىڭ ايتۋىنشا، ماسەلەنى شەشۋ ءۇشىن 400-گە جۋىق ارنايى تەحنيكا قاجەت. سونىڭ 141 بىرلىگىن بيىل ساتىپ الىپ، بىردەن تاسجولدارعا جىبەرۋ كوزدەلگەن.
قازىرگى ۋاقىتتا كوكتايعاقپەن كۇرەسۋ شارالارى ايرىقشا كۇشەيتىلدى. ول ءۇشىن ەلىمىزدە 507 وندىرىستىك بازا جۇمىس ىستەپ جاتىر. بارلىق قويمالاردا قاجەتتى ماتەريالدار ازىرلەنگەن. اتاپ ايتقاندا، 67 مىڭ تەكشە مەتر قۇم، 21 مىڭ توننا تۇز بەن 55 مىڭ تەكشە مەتر ۇنتاق ساقاداي ساي.
ايتا كەتەيىك، رەكونسترۋكسيالاۋ جانە جوندەۋ اياسىندا قالىڭ قار باسۋ ءقاۋىپى جوعارى ۋچاسكەلەردىڭ ۇزىندىعى 2،5 مىڭ شاقىرىمعا دەيىن قىسقارتىلدى. وسىعان دەيىن 3،5 مىڭ شاقىرىمدى قۇراعان بولاتىن. 419 شاقىرىمعا ستاسيونارلىق قار ۇستايتىن قورشاۋلار قويىلدى. بۇدان بولەك، 43 مىڭ مەترگە قاردان قورعايتىن قالقاندار ورناتىلدى. اتالعان ۋچاسكەلەرگە جاۋاپتى قىزمەتكەرلەر مەن قاجەتتى تەحنيكا دا بەكىتىلىپ وتىر.
رەسپۋبليكالىق ماڭىزى بار جولداردا «تايعاق جول»، «ماكسيمالدى جىلدامدىقتى شەكتەۋ» سياقتى ۋاقىتشا 4 461 جول بەلگىسى قويىلعان.
ءقاۋىپسىز جانە ۇزدىكسىز جول قوزعالىسىن قامتاماسىز ەتۋ ماقساتىندا اۋا رايىنا بايلانىستى 400-گە جۋىق تەحنيكا جانە 600-دەن استام ادام جۇمىلدىرىلعان.
جولشىلار تاۋلىك بويى پاترۋلدەۋمەن جۇيەلى تۇردە اينالىسادى. جىل سايىن قىس مەزگىلىندە جولدا قيىن جاعدايعا تاپ بولعان مىڭداعان جۇرگىزۋشىگە جول قىزمەتكەرلەرى ءبىرىنشى بولىپ كومەككە كەلەدى. ماسەلەن، بيىل قىس مەزگىلى باستالعاننان بەرى جولشىلار قار قۇرساۋىنان 4 مىڭعا جۋىق كولىك قۇرالىن شىعاردى، 8 مىڭنان استام جولاۋشىعا كومەك كورسەتتى.
ايتا كەتەيىك، ەلىمىزدە 120 جىلىتۋ پۋنكتى بار. ولار بوراندى، سۋىق كۇندەرى كولىگى سىنىپ، جۇرمەي قالعان كەزدە جولاۋشىلاردى ۋاقىتشا ورنالاستىرۋعا ارنالعان. بۇل بەكەتتەردە جول پايدالانۋشىلارى ءۇشىن تاماقتانىپ، جىلىنىپ، جۋىنۋى ءۇشىن بارلىق جاعدايلار قاراستىرىلعان. ال جۇرگىزۋشىلەر تەمىر تۇلپارلارىن جىلى بوكستەرگە قويىپ، جوندەي الادى.
بارلىق قىزمەتتەردىڭ بىرلەسكەن شارالارىن قابىلداۋ ۋاقىتىن كورسەتە وتىرىپ، قولايسىز اۋا رايى جاعدايلارىنا بايلانىستى قوزعالىستى شەكتەۋ كەزىندە ءوزارا ءىس-قيمىل الگوريتمى بەكىتىلدى.
شتاتتان تىس جاعدايلار جەدەل ارەكەت ەتۋ ءۇشىن پايدالانۋشىلاردىڭ قاتىسۋىمەن Whats اpp، تەلەگرامم سياقتى تانىمال مەسسەندجەرلەردە ارنايى توپتار قۇرىلدى.
سونىمەن قاتار، جول پايدالانۋشىلارى 1403 ءنومىرى بويىنشا «قازاۆتوجول» ۇق» اق ديسپەچەرلىك قىزمەتىنە جۇگىنگەن جاعدايدا، كولىك قۇرالدارىنا دەرەۋ كومەك كورسەتىلۋدە.