قىركۇيەكتەن باستاپ قازاقستاندا شاكىرتاقى كوبەيەدى

بۇل تۋرالى قۇجاتتى اشىق نقا ۆەب-سايتىنان كورۋگە بولادى.

قازاقستان رەسپۋبليكاسى عىلىم جانە جوعارى ءبىلىم مينيسترلىگى ءبىلىم بەرۋ ۇيىمدارىنداعى ءبىلىم الۋشىلارعا مەملەكەتتىك ستيپەنديالاردى تاعايىنداۋ، تولەۋ جانە مولشەرلەمەلەرى قاعيدالارىنا وزگەرىستەر ەنگىزدى، دەپ حابارلايدى Almaty-akshamy.kz

وسىلايشا، مەملەكەتتىك ءبىلىم بەرۋ تاپسىرىسى بويىنشا ءبىلىم الۋشىلارعا اي سايىنعى مەملەكەتتىك ستيپەنديانىڭ مولشەرى مىناداي مولشەردە بەلگىلەنەدى:

وقىتۋدىڭ پەداگوگيكالىق باعىتتارى مەن «دەنساۋلىق» باعىتى بويىنشا وقيتىن ستۋدەنتتەردى قوسپاعاندا، جوعارى وقۋ ورىندارىندا وقيتىن ستۋدەنتتەرگە – 36 660 تەڭگە (قازىرگى ۋاقىتتا – 31 423 تەڭگە)؛

پەداگوگيكالىق باعىتتا ءبىلىم الاتىن ستۋدەنتتەرگە – 58 800 تەڭگە (ءقازىر 50 400 تەڭگە)؛

«دەنساۋلىق ساقتاۋ» وقۋ باعىتى بويىنشا وقيتىن ستۋدەنتتەرگە – 58 800 تەڭگە (ءقازىر 50 400 تەڭگە)؛

ينتەرندەر – 61 660 تەڭگە (ءقازىر 59 289 تەڭگە)؛

ماگيسترانتتارعا – 86 987 تەڭگە (76 950 تەڭگە)؛

نازاربايەۆ ۋنيۆەرسيتەتىندە وقيتىن ماگيسترانتتارعا – 162 500 تەڭگە (143 750 تەڭگە)؛

دوكتورانتتار – 195 000 تەڭگە (172 500 تەڭگە)؛

«دەنساۋلىق ساقتاۋ» وقىتۋ باعىتى بويىنشا دوكتورانتتارعا – 195 000 تەڭگە (172 500 تەڭگە)؛

«دەنساۋلىق» وقىتۋ باعىتى بويىنشا رەزيدەنت دارىگەرلەر مەن ماگيسترانتتارعا – 100 036 تەڭگە (88 494 تەڭگە)؛

مەملەكەتتىك ورگانداردان وقۋعا جىبەرىلگەن قازاقستان رەسپۋبليكاسى جوعارعى سوتىنىڭ جانىنداعى سوت تورەلىگى اكادەمياسىنىڭ ماگيسترانتتارى ءۇشىن – سوڭعى جۇمىس ورنى بويىنشا لاۋازىمدىق جالاقىسى دەڭگەيىندە، ءبىراق بەلگىلەنگەن مەملەكەتتىك ستيپەنديانىڭ مولشەرىنەن تومەن ەمەس مەملەكەتتىك ءبىلىم بەرۋ تاپسىرىسى بويىنشا وقيتىن ماگيسترانتتار؛

تەحنيكالىق جانە كاسىپتىك ءبىلىم بەرۋ ۇيىمدارىندا جۇمىسشى بىلىكتىلىگى بويىنشا وقيتىن ستۋدەنتتەرگە – 21 787 تەڭگە (وزگەرىسسىز).

اتاپ وتكەندەي، جاڭا ستيپەنديالار 2022 جىلدىڭ 1 قىركۇيەگىندە كۇشىنە ەنەدى.

سونىمەن قاتار، مەملەكەتتىك ستيپەنديالاردى تولەۋدىڭ جاڭا ءتارتىبى ازىرلەندى. اشىقتىقتى قامتاماسىز ەتۋ ءۇشىن شاكىرتاقىنى كاسسير ارقىلى تولەۋ الىنىپ تاستالدى. ولار بانكتە نەمەسە «قازپوشتا» اق-دا شوت اشقاننان كەيىن جۇزەگە اسىرىلادى.

بۇل رەتتە ستۋدەنتتەر بانكتەر مەن «قازپوچتا» اق ءتيىستى كەلىسىمشارتتار جاساعاننان كەيىن شوت وپەراسيالارى ءۇشىن كوميسسيالاردى تولەمەيدى.