مۇندا ءتورت ۆالەنتتى گارداسيل ۆاكسيناسى قولدانىلادى.
قىركۇيەكتە 11 جاستاعى قىزدارعا ادام پاپيللوما ۆيرۋسىنا قارسى ۆاكسينا سالىنادى، دەپ حابارلايدى Almaty-akshamy.kz
بۇل تۋرالى دسم سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى زاۋرە احمەتوۆا مالىمدەدى.
"بيىلعى قىركۇيەكتە 11 جاستاعى قىزدارعا ادام پاپيللوما ۆيرۋسىنا قارسى ۆاكسينا سالۋ جوسپارلانعان. ادام پاپيللوما ۆيرۋسىنا قارسى ۆاكسيناسيا ءۇشىن ادام پاپيللوما ۆيرۋسىنىڭ ەڭ ونكوگەندى تۇرلەرىنەن قورعايتىن اقش-تىڭ 4 ۆالەنتتى "گارداسيل" ۆاكسيناسى قولدانىلادى. ادام پاپيللوما ۆيرۋسىنا قارسى ۆاكسيناسيا ونكولوگيالىق اۋرۋلاردىڭ، سونىڭ ىشىندە جاتىر موينى وبىرىنىڭ اۋىرتپالىعىن ازايتادى جانە جالپى حالىقتىڭ دەنساۋلىق كورسەتكىشتەرىن جاقسارتۋعا، ونكولوگيالىق اۋرۋلاردان بولاتىن سىرقاتتانۋشىلىق پەن ءولىم-جىتىمدى تومەندەتۋگە ىقپال ەتەدى"، - دەدى زاۋرە احمەتوۆا.
سپيكەر ەلىمىزدە جىل سايىن جاتىر موينى وبىرىنىڭ 1900-گە جۋىق جاڭا جاعدايى تىركەلەتىنىن جەتكىزدى. وكىنىشكە قاراي، جىل سايىن 600-دەن استام ايەل وسى اۋرۋ تۇرىنە قايتىس بولادى، دەپ جالعاستىردى ول.
"بۇگىندە ادام پاپيللوما ۆيرۋسىن جۇقتىرماۋدىڭ جانە جاتىر موينى وبىرىنىڭ الدىن الۋدىڭ جالعىز ءادىسى – ۆاكسيناسيا. 135 ەل ادام پاپيللوما ۆيرۋسىنا قارسى ۆاكسيناسيانىڭ تيىمدىلىگىن ەسكەرە وتىرىپ، بۇل ۆاكسينانى ۇلتتىق يممۋنداۋ باعدارلامالارىنا ەنگىزدى. ونىڭ ىشىندە وزبەكستان، قىرعىزستان، تاجىكستان، تۇرىكمەنستان مەملەكەتتەرى بار"، - دەدى دسم سانيتاريالىق-ەپيدەميولوگيالىق باقىلاۋ كوميتەتى ءتوراعاسىنىڭ ورىنباسارى.