بۇعان دەيىن قازاقستان مەن وزبەكستاننىڭ سۋ ۆەدومستۆولارى "دوستىق" ارناسى ارقىلى 922 ميلليون تەكشە مەتر سۋ وتكىزۋگە كەلىستى
قىرعىزستان قازاقستانعا جىبەرەتىن سۋ كولەمىن ۇلعايتادى، دەپ حابارلايدى اlmaty-akshamy.kz يرريگاسيا جانە سۋ رەسۋرستارى مينيسترلىگىنە سىلتەمە جاساپ.
ۆەدومستۆونىڭ مالىمەتىنشە، 2024 جىلعى سۋارۋ ماۋسىمىندا قىرعىزستاننان قازاقستانعا شۋ وزەنى ارقىلى 180 ميلليون تەكشە مەتر سۋ، تالاس وزەنىمەن 380 ميلليون تەكشە مەتر سۋ كەلەدى.
قۇرامىنا ەكى ەل وكىلدەرى كىرەتىن شۋ-تالاس سۋ كوميسسياسىنىڭ وتىرىسىندا سۋ ۆەدومستۆولارى اراسىنداعى كەلىسىمدەرگە قول جەتكىزىلدى.
"تاراپتار شۋ جانە تالاس وزەندەرىنىڭ بويىندا ورنالاسقان سۋ شارۋاشىلىعى نىساندارىنداعى جوندەۋ-قالپىنا كەلتىرۋ جۇمىستارىنىڭ تۇرلەرى مەن كولەمدەرى تۋرالى كەلىسىمگە كەلدى"، - دەپ تولىقتىردى سۋ رەسۋرستارى مينيسترلىگى.
بۇعان دەيىن قازاقستان مەن وزبەكستاننىڭ سۋ شارۋاشىلىعى ۆەدومستۆولارى "دوستىق" مەملەكەتارالىق ارناسى ارقىلى رەسپۋبليكاعا 922 ميلليون تەكشە مەتر سۋ جەتكىزۋگە كەلىستى، دەپ ەسكە سالدى ۆەدومستۆونىڭ باسپا ءسوز قىزمەتى.
"سۋارۋ ماۋسىمىنا دايىندىق بارىسىندا ەلىمىزدىڭ وڭتۇستىگىندەگى شارۋالاردى قاجەتتى سۋ كولەمىمەن قامتاماسىز ەتۋ بويىنشا اۋقىمدى جۇمىستار اتقارىلدى، كورشىلەس ەلدەرمەن ماڭىزدى كەلىسسوزدەر جۇرگىزىلدى"، - دەپ مالىمدەدى سۋ رەسۋرستارى ءمينيسترى نۇرجان نۇرجىگىتوۆ.
ول قىرعىزستاننىڭ سۋ رەسۋرستارى مينيسترلىگى ماۋسىم ايىنىڭ ءۇشىنشى ونكۇندىگىنىڭ باسىنان باستاپ جىبەرىلەتىن سۋ كولەمىن ارتتىراتىنىن باسا ايتتى.
سۋ مينيسترلىگى قىرعىز ارىپتەستەرىمەن بىرلەسە وتىرىپ، سۋ كولەمىن ارتتىرا وتىرىپ، كەستەنى تۇزەتۋگە كىرىستى، دەدى نۇرجىگىتوۆ.