قىرعىزستانمەن شەكاراداعى "كەگەن" وتكىزۋ بەكەتى تاۋلىك بويى جۇمىس ىستەيتىن بولادى

قىرعىزستانمەن شەكاراداعى "كەگەن" وتكىزۋ بەكەتى تاۋلىك بويى جۇمىس ىستەيتىن بولادى، - دەپ حابارلايدى aqshamnews.kz ءتىلشىسى. 

ءماجىلىس 2003 جىلعى 25 جەلتوقسانداعى قازاقستان مەن قىرعىزستان ۇكىمەتتەرى اراسىنداعى مەملەكەتتىك شەكارا ارقىلى وتكىزۋ پۋنكتتەرى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاسيالادى. قۇجاتقا 2024 جىلعى 19 ساۋىردە استانادا قول قويىلعان.

تۇزەتۋ "كەگەن-اۆتوجولدىق" (قازاقستان رەسپۋبليكاسى) – "قارقارا-اۆتوجولدىق" (قىرعىز رەسپۋبليكاسى) وتكىزۋ پۋنكتىنىڭ جۇمىس رەجيمىن "تاۋلىكتىڭ جارىق ۋاقىتىنان" "تاۋلىك بويىنا" وزگەرتۋدى كوزدەيدى. بۇل شەشىم قازاقستان مەن قىرعىزستان شەكارالىق ىنتىماقتاستىعىن ودان ءارى دامىتۋعا، تاۋار اينالىمىن ارتتىرۋعا، تۋريزم سالاسىنداعى ىنتىماقتاستىقتى كەڭەيتۋگە سەپتىگىن تيگىزەدى.

انىقتاما ءۇشىن: قىرعىزستانمەن شەكارادا 12 وتكىزۋ بەكەتى بار، ونىڭ 8ء-ى كوپجاقتى ("كەگەن"، "قاراسۋ"، "قورداي"، "سىپاتاي باتىر"، "ءايشا-بيبى"، "سارتوبە"، "اۋحاتتى"، "چالدوۆار") جانە تورتەۋى ەكىجاقتى (اقسۋ، بەساعاش، الاتاۋ، جايىل). قىرعىز رەسپۋبليكاسىمەن شەكارا حالىقارالىق قۇقىققا سايكەس تولىعىمەن بەكىتىلگەن.