قىرعىزستاندا حالىقارالىق ەتنوكارناۆال ءوتتى

ەتنوكارناۆال بىشكەكتە باستالىپ، ىستىقكولدە جالعاستى

ءحىى حالىقارالىق ەتنوكارناۆال قاتىسۋشىلارى بىشكەكتەن ىستىقكولگە شىقتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
كابار اگەنتتىگىندەگى مالىمەت بويىنشا، ەتنوكارناۆالعا قىرعىزستان، قازاقستان، رەسەي جانە وزبەكستاننان 500 بالا قاتىسىپ جاتىر. ماقسات – قىرعىزستان مەن تمد ەلدەرىنىڭ ەتنومادەني ەرەكشەلىكتەرىن زەرتتەۋ، جانداندىرۋ جانە ساقتاۋ، دوستىق قارىم-قاتىناس ورناتۋ. سونداي-اق، بالالاردىڭ كوركەمدىك، مۋزىكالىق، ۆوكالدىق، حورەوگرافيالىق شەبەرلىكتەرىن دامىتۋ. ەتنوكارناۆال بىشكەكتە شەرۋدەن باستالىپ، ىستىقكولگە باعىت الدى. باعدارلاما بويىنشا مۋزىكالىق قويىلىمدار، قاتىسۋشى ەلدەر شەبەرلەرىنىڭ حورەوگرافيا، ۆوكال، حالىق اسپاپتارى جونىندەگى شەبەرلىك ساعاتتارى قاراستىرىلعان. ءىس-شارا اياسىندا «ىستىقكول دوستاردى جينايدى-2022» VII حالىقارالىق بالالار شىعارماشىلىعى بايقاۋى وتەدى. بيىل العاش رەت «تەاتر ونەرى» نوميناسياسى بويىنشا بايقاۋ ۇيىمداستىرىلماق. قۇرامىندا ءتۇرلى ەلدەردىڭ جەتەكشى ماماندارى بار قازىلار القاسى كونكۋرسقا قاتىسۋشىلاردىڭ شىعارماشىلىعىن، ەڭبەكسۇيگىشتىگىن، ورىنداۋ ساپاسىن، ساحناداعى شەبەرلىگىن باعالايدى.