بيىل سۋارۋ ماۋسىمىندا ەلىمىزگە قىرعىزستاننان شۋ وزەنى ارقىلى 180 ملن تەكشە مەتر جانە تالاس وزەنىمەن 380 ملن تەكشە مەتر سۋ كەلەدى.
سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ قۇرامىنا قوس مەملەكەتتىڭ وكىلدەرى كىرەتىن شۋ-تالاس سۋ شارۋاشىلىعى كوميسسياسىنىڭ 33ء-شى وتىرىسىندا ءتيىستى كەلىسىمگە قول جەتكىزدى، دەپ حابارلايدى Almaty-akshamy.kz.
سۋ رەسۋرستارى جانە يرريگاسيا مينيسترلىگىنىڭ مالىمەتىنشە، سونداي-اق، كەزدەسۋ بارىسىندا تاراپتار شۋ جانە تالاس وزەندەرىندەگى سۋ شارۋاشىلىعى نىساندارىن جوندەۋ-قالپىنا كەلتىرۋ جۇمىستارىنىڭ تۇرلەرى مەن كولەمى تۋرالى دا كەلىسىمگە كەلدى.
ەستەرىڭىزگە سالا كەتەيىك، وسىعان دەيىن قازاقستان مەن وزبەكستاننىڭ سۋ ۆەدومستۆولارى ەلىمىزگە «دوستىق» مەملەكەتارالىق كانالى ارقىلى 922 ملن تەكشە مەتر سۋ بەرۋ جونىندە مامىلە جاساعان بولاتىن.
«حالىقارالىق ىنتىماقتاستىق – ءبىزدىڭ مينيسترلىك جۇمىسىنىڭ نەگىزگى باعىتتارىنىڭ ءبىرى. سۋارۋ ماۋسىمىنا دايىندىق بارىسىندا ەلىمىزدىڭ وڭتۇستىگىندەگى شارۋالاردى سۋدىڭ قاجەتتى كولەمىمەن قامتاماسىز ەتۋ ءۇشىن اۋقىمدى جۇمىس اتقارىلدى، كورشى مەملەكەتتەرمەن ماڭىزدى كەلىسسوزدەر جۇرگىزىلدى. بۇگىنگى تاڭدا قىرعىزستاننىڭ سۋ رەسۋرستارى مينيسترلىگىنىڭ باسشىلىعىمەن ماۋسىمنىڭ ءۇشىنشى ونكۇندىگىنەن باستاپ شۋ جانە تالاس وزەندەرى ارقىلى سۋ بەرۋدى ۇلعايتۋ تۋرالى ۋاعدالاستىققا قول جەتكىزىلدى. قازىرگى ۋاقىتتا قىرعىز ارىپتەستەرىمىزبەن بىرلەسىپ سۋ بەرۋ كەستەسىن ۇلعايتۋ باعىتىندا تۇزەتۋ جۇمىستارى جۇرگىزىلىپ جاتىر»، - دەدى ق ر سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ.