گرەك-ريم كۇرەسىمەن، بوكسپەن، تاەكۆوندومەن جانە بياتلونمەن اينالىساتىن جيىرما ءتورت جاس سپورتشى وتان الدىندا ادال بولۋعا انت بەردى.
قورعانىس مينيسترلىگى ورتالىق سپورت كلۋبىنىڭ قۇرامى 22 سپورت شەبەرى جانە 2 سپورت شەبەرىنە ۇمىتكەرمەن تولىقتى. ولاردىڭ اراسىندا 3 الەم چەمپيونى، 2 الەم كۋبوگى، 9 ازيا جانە 16 قازاقستان چەمپيونى بار، دەپ حابارلايدى Almaty-akshamy.kz.
جاسىنا قاراماستان، اسكەرگە شاقىرىلۋشىلاردىڭ ايتارلىقتاي جەتىستىكتەرى بار جانە وزدەرى اينالىساتىن سپورت تۇرلەرىنەن ەل قۇراماسىنىڭ ساپىندا شىعادى. بۇل قۇرامدا پاريجدەگى وليمپيادا ويىندارىنا ليسەنزيا العان مۇحاممەدسابىر بازارباي ۇلى دا بار.
سالتاناتتى شاراعا قورعانىس مينيسترلىگى سپورت كوميتەتىنىڭ ءتوراعاسى – ورتالىق سپورت كلۋبىنىڭ باستىعى پولكوۆنيك ارمان ابەۋوۆ، ەكى دۇركىن ازيا چەمپيونى، ەكى دۇركىن الەم چەمپيونى، وليمپيادا ويىندارىنىڭ چەمپيونى يۋريي مەلنيچەنكو، حالىقارالىق دارەجەدەگى سپورت شەبەرى، «قازاقستان بارىسى-2018» جەڭىمپازى ەرجان شىنكەيەۆ جانە اسكەرگە الىنعانداردىڭ تۋعان-تۋىستارى قاتىستى.
سپورت روتاسىنىڭ ساربازدارىن قورعانىس مينيسترلىگى سپورت كوميتەتىنىڭ ءتوراعاسى پولكوۆنيك ارمان ابەۋوۆ قۇتتىقتادى.
– وتانىمىزدىڭ يگىلىگى جولىنداعى قىزمەتتەرىڭ جاقىندارىڭ ماقتانا الاتىنداي ابىرويمەن ءوتۋى كەرەك. سپورتتاعى جانە ومىردەگى بارلىق جەڭىستەر ەلىمىزگە، قازاقستان رەسپۋبليكاسىنىڭ قارۋلى كۇشتەرىنە ارنالسىن دەگەن تىلەگىم بار. قورعانىس ءمينيسترى ارميا سپورتىن قاشاندا قولدايدى. اسكەردەگى قىزمەت بارىسىندا سەندەرگە جارىستاردا جاتتىعۋعا جانە ونەر كورسەتۋگە بارلىق جاعداي جاسالاتىن بولادى، – دەدى پولكوۆنيك ارمان ابەۋوۆ.
انت قابىلداۋ راسىمىنە دەيىن سپورت روتاسىنىڭ ساربازدارى جاس جاۋىنگەر كۋرسىن وقىپ ۇيرەندى. ولار قارۋ-جاراقپەن جانە قارۋسىز ءبىر ورنىندا جانە قوزعالىستا ساپتىق تەحنيكانى ۇيرەنىپ، جالپىاسكەري جارعىلاردى، اسكەري قىزمەت قاۋىپسىزدىگىنىڭ نەگىزدەرىن مەڭگەردى جانە اتىس دايىندىعىنان ءوتتى.
– سپورتتاعى جەڭىستەرى مەن رەكوردتارىنا قاراي ارميا كلۋبىنىڭ تاريحى باي ەكەنىن بىلەمىز. ءبىز ورتالىق سپورت كلۋبىنىڭ داڭقىن ارتتىرۋ ءۇشىن قولدان كەلگەننىڭ ءبارىن جاسايمىز. مۇنداي سپورت روتاسىندا بورىشىمىزدى وتەۋ ءبىز ءۇشىن ۇلكەن مارتەبە، – دەدى گرەك-ريم كۇرەسىنەن الەم چەمپيونى سۇلتان اسەت ۇلى.
كەزدەسۋ سوڭىندا كوميتەت ءتوراعاسى پولكوۆنيك ارمان ابەۋوۆ ساربازداردىڭ اتا-انالارىمەن اڭگىمەلەسىپ، ولاردىڭ قىزمەتىنىڭ ەرەكشەلىكتەرى تۋرالى ايتىپ بەردى.