جاپاروۆ التايەۆتىڭ ۇندەۋى ىڭعايسىز بولدى دەپ وتىر.
قازاق پەن قىرعىزدىڭ دوستىعىن العا تارتقان پرەزيدەنت بۇل جەردە ەشقانداي ساياسات جوق ەكەنىن ايتتى، دەپ حابارلايدى Almaty-akshamy.kz
بۇدان بۇرىن امانجول التايەۆ قىرعىز مەملەكەتىنىڭ باسشىسى قازاق اقىنى ءبىرجان قالدىبايەۆقا ارعىماق سىيعا تارتقانىن سىنعا العانىن جازعان ەدىك.
«ءيا، باۋىرىمىز امانجول التايەۆتىڭ الەۋمەتتىك جەلىدەگى ۇندەۋىن مەن دە وقىدىم. ارينە، بۇل ىڭعايسىز ۇندەۋ بولدى. ەڭ الدىمەن «ەلشىگە دە، انشىگە دە ءولىم جوق» دەيدى. ەلشىلەر ءوز جۇمىسىن جاسايدى. انشىلەر، ءتىپتى اقىندار وزدەرىنە ىڭعايلى جەردە ءان سالادى. سىن ايتىپ ءان سالادى، ماداقتاپ ءان سالادى، بىردەڭە سۇراۋ ءۇشىن ءان سالادى. ودان كەمشىلىك، ساياسات ىزدەۋدىڭ قاجەتى جوق. ەكىنشىدەن، اقىن ءبىرجان قالدىبايەۆ قىرعىزدىڭ جيەنى. مەن قازاقتىڭ جيەنىمىن. ءبىز تۋىسقانبىز. بەسىنشى اتام سولتونقۇلدىڭ ايەلى نووچا قازاقتىڭ قىزى ەدى. ۇشىنشىدەن، ءبىز قىرعىز-قازاقشا سويلەيتىن حالىقپىز. سول ساتتە ارعىماق سىيعا تارتپاسام، ول ماعان ءبىر كەزدە ءان شىرقايتىن ەدى. «ناعاشىم جاياۋ جىبەردى، ناعاشىمنىڭ ءبىر ارعىماققا شاماسى جوق پا؟ دەپ ايتار ەدى. ول جەرگە قاتىسپاسام، سول اقىننىڭ ءانىن ەستىمەسەم، اڭگىمە باسقا بولار ەدى. سوندىقتان امانجول مىرزاعا ايتارىم، ءسىز ەشقاشان جايسىز جاعدايعا تاپ بولعان جوقسىز»،- دەدى جاپاروۆ.
ول بۇل جەردە ەشقانداي ساياسات جوق ەكەنىن ايتتى.
«ايتىسكەر اقىن جيەنىمنىڭ سوزىنە ءتۇسىپ قالماس ءۇشىن عانا ارعىماق سىيعا تارتتىم. ال ەندى مەن ءبىرجان قالدىبايەۆتىڭ قانداي اقىن ەكەنىن دە بىلمەيمىن. مەن ونى بۇرىن دا تانىمايتىنمىن. ونى كوشە اقىنى دەپ اتاعان. ءقازىر كوشە اقىنى بولسا، اقىرى قازاق قىرعىز حالقىنا بەلگىلى اقىن بولىپ كەتەر؟ «بەسىكتەگى بالا پاتشا بولا ما، كىم ءبىلسىن، قۇرساعىنداعى بالا پاتشا بولا ما، كىم ءبىلسىن» دەيدى. ول جاس بالا ەكەن. قولداۋ بولسا اقىرى اتاقتى اقىن بولىپ شىعار. قازاق پەن قىرعىزدى بىزدەن باسقا ەشكىم قولدامايدى. ءبىز بىر-بىرىمىزگە قولداۋ كورسەتۋىمىز كەرەك. قازىرگى الەمدىك جاعداي وتكىر. قازاق پەن قىرعىزدىڭ اراسىنا وت سالعىسى كەلەتىن ءۇشىنشى كۇشتەر ءالى دە جوق ەمەس. ءبىز مۇنداي اداسۋشىلىقتان اۋلاق بولۋىمىز كەرەك. ارامىزداعى تىنىشتىقتى ساقتايىق. ونسىز دا ات توبەلىندەي عانا ەلمىز»،- دەدى قىرعىز پرەزيدەنتى.