قىرعىز ەلىندە قازاق كينوسىنىڭ كۇندەرى باستالدى

ەلىمىزدىڭ بەلگىلى كينوتۋىندىلارى قىرعىز ەلىندە كوپشىلىك نازارىنا ۇسىنىلادى

بىشكەكتە قازاقستاننىڭ قىرعىز رەسپۋبليكاسىنداعى مادەنيەت كۇندەرى اياسىندا قازاق كينوسىنىڭ كۇندەرى باستالدى. ءىس-شاراعا قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى رايىمقۇلوۆا مەن قىرعىز رەسپۋبليكاسىنىڭ مادەنيەت، اقپارات، سپورت جانە جاستار ساياساتى ءمينيسترى قايرات يمانالييەۆ جانە ەكى مەملەكەتتىڭ كينوگەرلەرى قاتىستى، دەپ حابارلايدى Almaty-akshamy.kz ق ر مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ.

اقتوتى رايىمقۇلوۆا قازاقستان مەن قىرعىزستان اراسىنداعى قارىم-قاتىناستاردىڭ تامىرى تەرەڭدە ەكەنىن، تاۋەلسىزدىك العان جىلدارى جاڭاشا قارقىنمەن دامىپ كەلە جاتقانىن، حالىقتار اراسىنداعى ءداستۇرلى باۋىرلاستىق بايلانىستار بارلىق باعىتتا دايەكتى تۇردە دامۋ ۇستىندە ەكەنىن ايتتى.

ايتا كەتەيىك، «ماناس» كيونوتەاترىندا باستالعان قازاق كينوسىنىڭ كۇندەرى 9 قازانعا دەيىن جالعاسادى. كورەرمەندەر نازارىنا رۇستەم ابدىراشيەۆتىڭ «الماس قىلىش»، اقان ساتايەۆتىڭ «توميريس»، «جاۋ جۇرەك مىڭ بالا»، «اناعا اپارار جول»، «قازاق حاندىعى. التىن تاق» فيلمدەرى مەن تۇردىبەك مايدان مەن تىلەك تولەۋعازىنىڭ «مۇزبالاق»، اداي ءابىلدينوۆتىڭ «كۇلتەگىن» انيماسيالىق ءفيلمى ۇسىنىلادى.