ايىرقالپاقتىلار ەلىندە تۇراتىن قازاقتار باس قوستى

قىرعىز جەرىندە قانشا قازاق بار؟

بىشكەكتە «وتانداستار» قورىنىڭ پرەزيدەنتى نۇرتاي ابىقايەۆتىڭ توراعالىعىمەن قىرعىزستاندا تۇراتىن قازاقتاردىڭ كەزدەسۋى ءوتتى، دەپ حابارلايدى Almaty-akshamy.kz

24.kz سايتىنىڭ اقپاراتىنا سايكەس، اتالعان كەزدەسۋ الىكۋل وسمونوۆ اتىنداعى ۇلتتىق كىتاپحانادا ۇيىمداستىرىلدى. وسى مەكەمەدە اباي اتىنداعى قىرعىز-قازاق ورتالىعى ەكىنشى جىل جۇمىس ىستەپ كەلەدى. ەندى مۇندا قازاقتاردىڭ دۇنيەجۇزىلىك قاۋىمداستىعى مەن «وتانداستار قورىنىڭ» باستاماسىمەن اشىلعان «اباي ءۇيى» مادەني-ىسكەرلىك ورتالىعى ورنالاسادى.

ونىڭ تۇساۋكەسەرىنە ەكى رەسپۋبليكانىڭ دەپۋتاتتارى، عىلىمي قاۋىم وكىلدەرى جانە كورشى ەلدە قازاق مادەنيەتىن ناسيحاتتاۋعا ۇلەس قوسىپ جۇرگەن قانداستار قاتىستى.

ەلشىلىك مالىمەتىنشە، قىرعىز رەسپۋبليكاسىندا 39 مىڭداي قازاق تۇرادى.

«بۇل كەزدەسۋدە ولاردىڭ كوكەيىندە جۇرگەن باستى ماسەلەلەر، ولاردىڭ جوبالارى تالقىلانىپ، سولارعا قولداۋ كورسەتۋ تەتىكتەرى پىسىقتالادى. بۇل ءىس-شاراعا قازاقستان رەسپۋبليكاسى پارلامەنتىنىڭ دەپۋتاتتارى قاتىسۋدا، قىرعىز تاراپىنان دا وتە جوعارى دەڭگەيدە ءوتىپ جاتىر»، - دەيدى «وتانداستار قورى» كوممەرسيالىق ەمەس اكسيونەرلىك قوعامنىڭ ۆيسە-پرەزيدەنتى ماعاۋيا سارباسوۆ.