الماتى تورىندەگى «الاتاۋ» ءداستۇرلى ونەر تەاترىندا «رۋحاني جاڭعىرۋ» باعدارلاماسى اياسىندا ەل جايلاۋعا شىققاندا، جازعىتۇرىم اتالىپ وتەتىن قىمىز تويى – «قىمىزمۇرىندىق» ەتنوفەستيۆالى ءوتتى.
ەل تاۋەلسىزدىگىنىڭ 30 جىلدىعىنا وراي ۇيىمداستىرىلعان شاراعا تەاتردىڭ تۇراقتى كورەرمەندەرى مەن زەينەتكەرلەر قاتىسىپ، قىمىز تۇرلەرىمەن تانىستى. سونداي-اق، حالقىمىزدىڭ جىل ماۋسىمىنا قاراي اتاعان ۋىز قىمىز (مامىر قىمىزى)، جازعى قىمىز، كۇزگى قىمىز (سىرگە قيار)، قىسقى قىمىز (قىسىراق قىمىزى) تۇرلەرىن تاماشالادى. كورمەگە قىمىزدان جاسالعان كوسمەتيكالىق بۇيىمداردىڭ ءتۇر-تۇرى قويىلىپ، قالىڭ كوپشىلىكتىڭ نازارىن اۋداردى.
«قىمىزمۇرىندىق – قازاق حالقىنىڭ تاريحىنان ويىپ تۇرىپ ورىن الىپ كەلە جاتقان اتا ءداستۇرى. وسى ءبىر كەرەمەت مەرەكەنى جاڭعىرتىپ، كوركىن كىرگىزىپ جاتقانىمىزعا قۋانىشتىمىن. بىزدە قىمىزدىڭ ءارتۇرلى تۇرلەرى بار، سونىڭ ءبارىن ەلگە تانىستىرىپ، كەڭ اۋقىمدا وتكىزسەك دەگەن وي بار»، ‒ دەدى «الاتاۋ» ءداستۇرلى ونەر تەاترىنىڭ باس رەجيسسەرى جۇلدىزبەك جۇمانباي.
قىمىزمۇرىندىق - باياعىدان كەلە جاتقان داستۇرلەرىمىزدىڭ ءبىرى. ياعني قۇلىن بايلاپ، بيە ساۋىلعان سوڭ العاشقى قىمىز ءىشۋ راسىمىنە اۋىل اقساقالدارى مەن كورشىلەر شاقىرىلعان.
«ءاربىر مەملەكەتتىڭ ءوزىنىڭ ءتولقۇجاتى بار. مىسالى، برازيليانىڭ ناۋرىزدا وتەتىن Rio فەستيۆالى بار. گەرمانيانىڭ سىرا فەستيۆالى بار. ال ءبىزدىڭ قازاقتىڭ ءوزىنىڭ ءتولقۇجاتىنا اينالعان، بۇكىل الەم مويىنداعان قىمىز سۋسىنىن وسىنداي دەڭگەيگە كوتەرە الاتىن بولساق، شىنىمەن رۋحاني جاڭعىرعانىمىز بولادى»، ‒ دەدى «الاتاۋ» ءداستۇرلى ونەر تەاترىنىڭ ديرەكتورى رينات زايىتوۆ.