قىمىز قۇيعىش «اسىلبەك»

قازاقستاندىق وقۋشى قىمىز قۇياتىن روبوت ويلاپ تاپتى.

ۇلتتىق سۋسىندى ۇسىناتىن روبوت «اسىلبەك» دەپ اتالادى، دەپ حابارلايدى Almaty-akshamy.kz وtyrar.kz-كە سىلتەمە جاساپ.

تۇركىستان وبلىسى، تولە بي اۋدانى، ش.ءۋاليحانوۆ اتىنداعى №2 جالپى ورتا مەكتەبىنىڭ 9-سىنىپ وقۋشىسى جانسۇلتان تورەبەك قىمىز قۇياتىن روبوت جاساپ شىعاردى.

جانسۇلتانعا روبوتتى جاساپ شىعۋعا ينفورماتيكا ءپانىنىڭ ءمۇعالىمى كومەكتەسكەن.

كەز كەلگەن ادام روبوتقا ارنايى پلاستيكالىق كارتانى جاقىنداتۋ ارقىلى «اسىلبەكتى» سويلەتە الادى. سودان كەيىن روبوت قىمىزدىڭ شيپالى قاسيەتى تۋرالى قىسقاشا ماعلۇمات بەرەدى. وسىدان سوڭ عانا ول ىدىسقا ءشول باساتىن پايدالى سۋسىندى قۇيادى.

«روبوتتاردىڭ تۇرلەرىنە، جۇمىس ىستەۋ پرينسيپتەرىنە قىزىعۋشىلىعىم بۇرىننان بار بولاتىن. مۇنداي روبوت قۇراستىرۋ يدەياسى مەكتەبىمىزدە وتكەن ينفورماتيكا ءپانى اپتالىعىندا ۇيىمداستىرىلعان روبوتتار كورمەسى كەزىندە تۋدى. «اسىلبەك» روبوتىن جاساۋ تۋرالى ويىممەن الدىمەن ءمۇعالىمىم لاۋرا اپايمەن ءبولىستىم. ول يدەيامدى قولداپ، قۇراستىرۋدا كومەكتەسەتىنىن ايتتى»، - دەيدى جانسۇلتان.

ونىڭ پىكىرىنشە، روبوت وقۋشىلاردىڭ روبوتوتەحنيكاعا دەگەن قىزىعۋشىلىعىن ارتتىرىپ قانا قويماي، ەمدىك قاسيەتكە يە قىمىز ارقىلى جاستاردىڭ اراسىندا سالاۋاتتى ءومىر سالتىن دارىپتەيدى.

«ۇلتتىق سۋسىنىمىزدى ناسيحاتتايتىن بولعاندىقتان، «اسىلبەكتىڭ» ۇلتتىق كيىمدە بولعانى دۇرىس دەپ شەشتىك»، – دەپ اتاپ ءوتتى 9-سىنىپ وقۋشىسى.

جانسۇلتاننىڭ قىمىز قۇياتىن روبوت جوباسى اۋداندىق جانە وبلىستىق عىلىمي جوبالار بايقاۋىندا جۇلدەلى بولدى.