قىلمىستىق توپ قىمبات كولىكتەردى جالعا الىپ، لومباردقا وتكىزىپ كەلگەن

ءتارتىپ ساقشىلارى قىلمىستىق ءىس بويىنشا 9 كۇدىكتىنى قولعا ءتۇسىردى

شىمكەنتتە ۇيىمداسقان قىلمىستىق توپ ارەنداعا بەرىلگەن قىمبات كولىكتەرگە قولدان قۇجات جاساپ، لومباردقا وتكىزىپ كەلگەن، دەپ حابارلايدى Almaty-akshamy.kz.

قالاداعى لومباردتاردىڭ بىرىندە جۇمىس ىستەگەن قىلمىستىق توپ باسشىسى ءوز تاجىريبەسىنە سۇيەنىپ، قوماقتى اقشا تابۋدىڭ جولىن ويلاپ تاپقان. سودان قاسىنا 8 تانىسىن تارتقان.

قىلمىستىق توپتىڭ ءار مۇشەسى وزدەرىنە جۇكتەلگەن مىندەتتى مۇدىرمەي ورىنداپ وتىرعان. ءبىرى جالعا قىمبات كولىكتەر تابۋمەن اينالىسسا، ەكىنشىسى ولارعا جالعان قۇجات جاساعان. كەيىن ماشينالاردى اۆتولومباردتارعا وتكىزگەن.

وسىلايشا كۇدىكتىلەر كەستە بويىنشا ارەكەت ەتىپ، ءبىر جىل ىشىندە «Lexus LX 570»، «Toyota Land Cruiser 200» سياقتى قىمبات 5 شەتەلدىك كولىكتى لومباردتارعا قالدىرىپ، قارجى العان.

ءبىراز ۋاقىتتان كەيىن قارىز الۋشىلارمەن بايلانىسقا شىعا الماعان لومبارد قىزمەتكەرلەرى الاياقتىق تۋرالى پوليسياعا حابارلاعان.

جابىرلەنۋشىلەرگە كەلتىرىلگەن زالالدىڭ جالپى سوماسى شامامەن 40 ملن تەڭگەنى قۇرايدى.
ءتارتىپ ساقشىلارى قىلمىستىق ءىس بويىنشا 9 كۇدىكتىنى قولعا ءتۇسىردى.

«قىلمىستىق ءىس بىرنەشە باپ بويىنشا تىركەلدى: ق ر قك-نىڭ 262-بابىمەن «ۇيىمداسقان توپ، قىلمىستىق ۇيىم قۇرۋ جانە ولارعا باسشىلىق ەتۋ، سول سياقتى ولارعا قاتىسۋ»، ق ر قك-نىڭ 190-بابىمەن «الاياقتىق»، ق ر قك-نىڭ 385-بابىمەن «جالعان قۇجاتتاردى، ءمورتابانداردى، مورلەردi، بلانكىلەردى، مەملەكەتتiك پوشتا تولەمى بەلگىلەرىن، مەملەكەتتiك ناگرادالاردى قولدان جاساۋ، دايىنداۋ نەمەسە وتكiزۋ»، ق ر قك-نىڭ 386-بابىمەن «كولىك قۇرالىنىڭ سايكەستەندىرۋ ءنومىرىن قولدان جاساۋ، جويۋ، كورىنەۋ قولدان جاسالعان سايكەستەندىرۋ ءنومىرى بار كولىك قۇرالىن وتكىزۋ. قازىرگى ۋاقىتتا ۇيىمداسقان قىلمىستىق توپتىڭ بارلىق مۇشەسى، ياعني 9 ادام قاماۋدا. قىلمىستىق ءىس ايىپتاۋ اكتىسىمەن سوتقا جولداندى»، - دەلىنگەن شىمكەنت قالاسى پوليسيا دەپارتامەنتىنىڭ باسپا ءسوز قىزمەتى تاراتقان حابارلامادا.