قىلمىس جاسامايتىن اۋىل

ەلىمىزدە بىردە-بىر قىلمىس جاسالماعان جەر بار ەكەن.

ءتىپتى، ول جەردىڭ تۇرعىندارى ىشىمدىك ىشۋدەن باس تارتقان، دەپ حابارلايدى Almaty-akshamy.kz

«جامبىل وبلىسى سارىسۋ اۋدانىنىڭ جاڭاارىق اۋىلدىق وكرۋگى ەڭ ۇلگىلى اۋىل اتاعىنا ۇمىتكەر. مۇندا سوڭعى 4 جىلدا بىردە-بىر قىلمىس تىركەلمەگەن. اۋىلدىق وكرۋگكە اقتوعاي جانە ۇزاقباي سىزدىقبايەۆ اۋىلدارى كىرەدى، وندا 1700-گە جۋىق ادام تۇرادى»، - دەلىنگەن Polisia.kzء-تىڭ اقپاراتىندا.

وكرۋگتەگى ءۇش دۇكەندە الكوگول مەن تەمەكى ساتىلمايدى. جاقىندا ءتورتىنشى دۇكەن اشىلادى، ءبىراق ول كاسىپكەر دە اۋىل تۇرعىندارىنىڭ باستاماسىن بىردەن قولداعان. مۇنداي شەشىمدى تۇرعىندار ۇرپاقتى ازعىرماۋ ءۇشىن اقىلداسا وتىرىپ قابىلداعان.

ناتيجە بىردەن بايقالا باستادى. بۇل باستاما قىلمىس پەن قۇقىقبۇزۋشىلىقتاردىڭ، سونداي-اق وتباسىلىق جانجالداردىڭ الدىن الادى. ءبىراق بۇل جەردە ۋچاسكەلىك پوليسيا ينسپەكتورىنىڭ قۇقىقبۇزۋشىلىقتىڭ الدىن الۋ بويىنشا جۇيەلى جۇمىسى دا ماڭىزدى ءرول اتقارادى. ۋچاسكەلىك ينسپەكتور ساعىنعالي سالاماتوۆ 5 جىلدان بەرى سىزدىقبايەۆ اۋىلىندا تۇرادى. ول ءوز اۋماعىنداعى احۋالدى تولىق مەڭگەرۋ ءۇشىن جۇيەلى شارالار قولدانادى: رەيدتەر جۇرگىزىپ، پوليسيادا ەسەپتە تۇرعان ادامداردى تۇرعىلىقتى جەرى بويىنشا تەكسەرەدى، ازاماتتىق قارۋ يەلەرىنىڭ ەرەجەلەردى ساقتاۋىنا تەكسەرۋلەر جۇرگىزەدى.

جامبىل وبلىسىندا وسىنداي ۇلگىلى باسقا دا اۋىلدار بار. بەس اۋداندا 12 اۋىلدىق وكرۋگ الكوگولدەن باس تارتقان. ناتيجە بارلىق جەردە بىردەي: ولار ەڭ ءقاۋىپسىز اۋىلدار دەپ تانىلدى. بۇل جۇمىستا اۋىل تۇرعىندارىنىڭ داۋلى ماسەلەلەرىن شەشۋگە كومەكتەسىپ، بارلىعىن بەيبىتشىلىك پەن كەلىسىمگە شاقىراتىن اۋىل اقساقالدارىنا ۇلكەن ءرول بەرىلەدى.