پرەزيدەنت ءتيىستى جۇمىس اتقارىلماسا، مۇنى استىرتىن قارسىلىق ءبىلدىرۋ دەپ تۇسىنۋگە تۋرا كەلەتىنىن ايتتى
ەلوردانى دامىتۋ ماسەلەلەرى جونىندە كەڭەستە قاسىم-جومارت توقايەۆ استانا سۋ قويماسىنىڭ قازىرگى جاعدايى تۋرالى ايتتى، دەپ حابارلايدى Almaty-akshamy.kz.
«ءقازىر سۋ قويماسى لايلانىپ، لاستانىپ جاتىر. مۇنى قۇزىرلى مينيسترلىك بىلۋگە ءتيىس. قويمانىڭ ءتۇبىن تازالاپ، ونى تەرەڭدەتۋ كەرەك. استانا سۋ قويماسىنىڭ بوگەتىن تولىق تەكسەرىپ، نىعايتۋ قاجەت. وعان ساتبايەۆ كانالىنان سۋدىڭ تۇراقتى كەلىپ تۇرۋىن قامتاماسىز ەتكەن ءجون. وسى شارالاردى دەرەۋ قولعا الۋ كەرەك. قويمانىڭ تەحنيكالىق جاعدايىن شۇعىل رەتكە كەلتىرۋ قاجەت. بۇل – وتە ماڭىزدى ماسەلە. استانادا بۇدان باسقا سۋ كوزى جوق. اشىعىن ايتساق، مۇنداي احۋال كوپتەن بەرى جالعاسىپ كەلەدى، ياعني بۇل ءبىر كۇندە پايدا بولعان ماسەلە ەمەس. بۇعان دەيىن ەكولوگيا مينيسترلىگىنە قالانى سۋمەن قامتاماسىز ەتۋ ءۇشىن كەشەندى جۇمىس جاساۋ تاپسىرىلدى. ءبىراق، ءالى كۇنگە دەيىن ناقتى ناتيجە جوق. ءتىپتى، وسى ماسەلەنى شەشۋگە قاتىستى ءتيىمدى ۇسىنىستار دا جوق. تاعى دا قايتالاپ ايتامىن: قۇزىرلى مينيسترلىك ناقتى شارالار قابىلداۋعا ءتيىس»، - دەدى پرەزيدەنت.
مەملەكەت باسشىسى استانانى اۋىز سۋمەن قامتاماسىز ەتۋ ماسەلەسىن كەيىنگە قالدىرا بەرۋگە بولمايتىنىن اتاپ ءوتتى.
«ءتيىستى جۇمىس اتقارىلماسا، مۇنى استىرتىن قارسىلىق ءبىلدىرۋ دەپ تۇسىنۋگە تۋرا كەلەدى. احۋالدى دەرەۋ تۇزەۋ قاجەت. باس قالانى وسىنداي جاعدايدا قالدىرمايمىز. ۇكىمەت اكىمدىكپەن بىرلەسىپ، كەلەسى جىلدان باستاپ ساتبايەۆ كانالىنان قالاعا دەيىن قۇبىر تارتۋ جۇمىستارىن قولعا الۋعا ءتيىس. سونىمەن بىرگە، ۇكىمەت اكىمدىكپەن بىرگە سۋمەن قامتاماسىز ەتۋدىڭ بالامالى جولدارىن قازىردەن باستاپ قاراستىرۋى كەرەك»، - دەدى ول.