الماتى مەملەكەتتىك قۋىرشاق تەاترى قازىرگى زاماناۋي تەندەنسيالاردى، كوركەمدىك-ەستەتيكالىق وزگەرىستەردى، جاھاندىق الەمدەگى جاڭا باعىتتار مەن ۇزدىك شەشىمدەردى مەڭگەرۋ، تەاتردىڭ بۇگىنگى تىنىسىن كەڭەيتۋ جولىندا حالىقارالىق ءىرى جوبالارعا قاتىسۋدى نەگىزگى جۇمىس بارىسىنا اينالدىرعان، دەپ حابارلايدى Almaty-akshamy.kz.
وسى ورايدا، تەاتر ۇجىمى قازاقستان عانا ەمەس تۇركيا، رەسەي مەملەكەتتەرىمەن قاتار ەۋروپا ەلدەرىنىڭ دە ءىرى، بەدەلدى قۋىرشاق تەاتر فەستيۆالدەرىنە ارنايى شاقىرتۋ الىپ، ۇزدىكتەر قاتارىنان كورىنىپ جۇرگەندىگىن باسا ايتا كەتكەن ءجون.
تەاتردىڭ باسپا ءسوز قىزمەتىنىڭ حابارلاۋىنشا، 2022 جىلى اتالمىش ونەر ۇجىمى بولگاريا رەسپۋبليكاسى، ۆارنا قالاسىندا وتكىزىلگەن XVII حالىقارالىق «التىن دەلفين» قۋىرشاق تەاترلار فەستيۆالىندە الەمدىك كلاسسيكانىڭ وزىق ۇلگىسى – «رومەو مەن دجۋلەتتا» (رەج.:د.جۇمابايەۆا) ويىلىمىن ۇسىنىپ گران - پري جۇلدەسىن، سونىمەن قاتار تەاتر ارتيستەرى شوحان قۇلنازاروۆ «ەڭ ۇزدىك ەر ادام ءرولى»، ۇلان اسانبەك جانە ۇلپان سەرىك «ەڭ ۇزدىك» دەبيۋت نوميناسيالارىن يەلەنگەن بولاتىن.
بيىلعى جىلى ەۋروپانىڭ ءتورى بولگاريا رەسپۋبليكاسى، بۋرگاس قالاسىندا 30 شىلدە مەن 5 تامىز ارالىعىندا وتكىزىلگەن اشىق اسپان استىنداعى ح حالىقارالىق “قۋىرشاق كۇندەرى” اتتى فەستيۆالگە ارنايى جولداما الىپ، تەاتردىڭ بويتۇمارىنا اينالعان، وتىز سەگىز جىلدىق تەرەڭ تاريحقا يە قۋىرشاق تەاترىنىڭ اناسى قۇرالاي ەشمۇراتوۆانىڭ رەجيسسەرلىگىمەن ساحنالانعان «قۋىرشاق دۋمان» قويىلىمىمەن قاتىستى.
سونىمەن قاتار، ح حالىقارالىق “قۋىرشاق كۇندەرى” اتتى فەستيۆال اياسىندا تەاتر ۇجىمى بۋرگاس قالاسىنىڭ مەرى – ديميتر نيكولوۆتىڭ ارنايى قابىلداۋىندا بولىپ بولاشاقتاعى بىرلەسكەن جوبالار تۋراسىندا جوسپارلار قۇرىلىپ، جۇزەگە اسىرىلۋى تالقىلاندى.
بۋرگاس مەملەكەتتىك قۋىرشاق تەاترىنىڭ باسشىسى حريستينا ارسەنوۆامەن شىعارماشىلىق كەزدەسۋ ۇيىمداستىرىلىپ، زاماناۋي تەحنيكالىق جابدىقتاردى قولدانا كۇردەلى دە ساپالى قۋىرشاقتاردىڭ دايىندالۋىنان، جۇرگىزىلۋى مەن ساقتالۋىنان، تەاتر تىنىسىنىڭ حابار بەرەتىن ەكسكۋرسيامەن جالعاسىن تاپتى.
اتالمىش فەستيۆالگە ەلىمىزدەن بولەك بولگاريا، نيدەرلاند، رۋمىنيا مەملەكەتتەرىنەن ىرىكتەلگەن تاڭداۋلى ون ءۇش ۇجىم ونەر كورسەتكەن ءدۇبىرلى دودادا الماتى مەملەكەتتىك قۋىرشاق تەاترى بۋرگاس قالاسى اكىمشىلىگىنىڭ شەشىمىمەن «گران-پري» جۇلدەسىن جەڭىپ الدى.
