قازاقستاندا سوڭعى 5 جىلدا پاتەر توناۋ قىلمىسى ازايىپ كەلەدى. بۇل تۋرالى ق ر ءىىم كريمينالدى پوليسيا دەپارتامەنتىنىڭ اسا ماڭىزدى ىستەر جونىندەگى اعا جەدەل ۋاكىلى اسەت جۇكەنوۆ ايتىپ بەردى، دەپ حابارلايدى Almaty-akshamy.kz.
«ۇيىمداستىرۋ شارالارى مەن ماقساتتى جۇمىس ناتيجەسىندە جىل باسىنان بەرى 1،5 مىڭنان استام پاتەر ۇرىسى ۇستالدى. ونىڭ ىشىندە 100-گە جۋىق «گاسترولەر» ۇرىلار، ياعني ءتۇرلى قالالاردا ۇرلىق جاسايتىندار جانە 175 قىلمىستىق توپ ۇستالدى»، - دەدى اسەت جۇكەنوۆ ق ر ءىىم اپتالىق بريفينگىندە.
ماسەلەن، جىل باسىندا الماتىدا شىعىس قازاقستان وبلىسىنىڭ 3 تۇرعىنى، ياعني گاسترولەر-پاتەر ۇرىلارى ۇستالدى. ولار پلاستيكالىق تەرەزەلەر ارقىلى ۇيلەرگە كىرىپ، 5 رەت ۇرلىق جاساعان. جالپى، كەلتىرىلگەن زالال 9 ملن تەڭگەدەن استى، ولاردىڭ بارلىعى 3 جىلعا باس بوستاندىعىنان ايىرىلدى.
بيىلعى جاز ماۋسىمىندا جەدەل-ىزدەستىرۋ ءىس-شارالارى ارقىلى اقمولا وبلىسىنىڭ ششۋچينسك قالاسىنىڭ بۇرىن سوتتالعان تۇرعىنى ۇستالدى. ول وسى قالادا تۇرعىنداردىڭ جوقتىعىن پايدالانىپ، ءۇش پاتەردى توناعان. زالال 3 ملن تەڭگە بولدى.
جالپى، قابىلدانعان شارالار ناتيجەسىندە سوڭعى 5 جىلدا پاتەر ۇرلىعى جىل سايىن ورتا ەسەپپەن 34،4%-عا تومەندەدى. 2018 جىلى 34 مىڭنان استام قىلمىس تىركەلسە، 2022 جىلى 11 مىڭنان اسپاعان. بيىل دا 16،1% نەمەسە 1 100 قىلمىسقا تومەندەۋ بايقالادى.
«ءبىراق، جەكە مۇلىكتى ۇرلاعان ادامدار پاتەرگە كىرۋ داعدىلارى مەن تاسىلدەرىن ۇنەمى جەتىلدىرىپ وتىراتىنىن اتاپ وتكەن ءجون. ولار زاماناۋي تەحنيكانى، ۇيالى بايلانىستى پايدالانادى، ەسىكتەر مەن قۇلىپتاردى اشۋعا ارنايى بەيىمدەلگەن قۇرالداردى ساتىپ الادى جانە جاسايدى. بۇل رەتتە، نەگىزىنەن پاتەر ۇرلىعى كۇندىزگى ۋاقىتتا، اتاپ ايتقاندا بارلىعى جۇمىستا نەمەسە وقۋدا بولعان كەزەڭدە جاسالادى»، - دەدى سپيكەر.